Наманган вилояти Чуст туманида 43 та жаримаси ва кредит қарздорлиги борлиги сабаб қидирувда бўлган автомобиль устахонадан топилди. Бу ҳақда МИБ ахборот хизмати “Дарё”га хабар берди.
Унга кўра, Мажбурий ижро бюросининг Чуст туман бўлими иш юритувида фуқаролик ишлари бўйича Наманган туманлараро судининг ижро варақасига асосан қарздор М.Ш.дан банк фойдасига 160 млн 270 минг 177 сўм кредит ва 6 млн 410 минг 807 сўм давлат божи ундириш белгиланган.
Қарздорлик М.Ш.га тегишли бўлган Lacetti’га қаратилган. Бундан ташқари, фуқаролик ишлари бўйича Чуст туманлараро судининг ижро варақасига асосан, М.Ш.дан ундирувчи суғурта ташкилоти фойдасига ҳам 10 млн 557 минг 360 сўм қарз ундириш ҳамда 442 394 сўм давлат божи ундириш кўрсатилган.
Мазкур транспорт воситаси ҳайдовчисининг йўл ҳаракати қоидаларини бузганлик учун қўлланган ва тўланмаган 43 та маъмурий жаримаси ҳам иш юритувига келиб тушган. Умумий қарздорлик эса 185 млн 401 минг 719 сўмни ташкил этган. Мазкур қарздорликни ундириш мақсадида давлат ижрочиси томонидан ҳаракатлар олиб борилган.
Яъни қарздорнинг суд қарорида кўрсатилган яшаш хонадони холислар ҳамда маҳалла вакиллари иштирокида ўрганилганда, бу манзилдан кўчиб кетгани аниқланган. Қарздорга тегишли автомобилга қидирув эълон қилинган.
Олиб борилган ижро ҳаракатлари давомида қарздорга тегишли автотранспорт воситаси автоҳалокатга учрагани аниқланиб, таъмирлаш устахонасидан топилди. Ҳозирда автотранспорт воситасини қарздорлик ҳисобига реализация қилиш чоралари кўрилмоқда.
Изоҳ (0)