Самарқандда 34 марта йўл қоидасини бузиб, жаримасини тўламаган фуқаронинг Nexia-3 автомашинаси Тошкентда ушланганда унинг 118 миллион сўмлик кредит қарзи борлиги ҳам аниқланди.
МИБ ахборот хизмати “Дарё”га хабар беришича, бюронинг Самарқанд вилояти бошқармаси ва ички ишлар органлари йўл ҳаракати хавфсизлиги ходимлари ҳамкорлигида йўл ҳаракати қоидаларини бузгани учун қўлланилган маъмурий жарималарни ундириш юзасидан рейд тадбирлари ўтказилмоқда. Қарздорлик ўз вақтида бартараф этилмаса, автотранспорт воситасига нисбатан қидирув эълон қилиниб, қарздорнинг бошқа даромадлари аниқланади ва ундиришга йўналтирилади.
Айни пайтда мажбурий ижро бюроси органлари иш юритувидаги ижро ҳужжатларига кўра, 34 марта йўл ҳаракати қоидасини бузган Каттақўрғон туманида яшовчи фуқаро К.М.нинг Nexia-3 автотранспорт воситаси Тошкент шаҳридан топилиб, вақтинчалик сақлаш учун жарима майдончасига жойлаштирилиш вақтида унинг яна 118 миллион 140 минг сўмлик кредит қарзи ва 4 миллион 823 минг сўмлик давлат божи ҳам аниқланган.
Ҳозирда қарздорликлар тўлиқ бартараф этмаса, транспорт воситаси тегишли тартибда аукцион савдоларида сотилиб, тушган маблағлар қарздорликка йўналтирилади.
Изоҳ (0)