Қорақалпоғистонда фермер хўжаликлари масъул шахслари 180 миллион сўмлик электрдан ноқонуний фойдалангани аниқланди. Бу ҳақда Прокуратура департаменти хабар берди.
Унга кўра, ҳолат Бош прокуратура ҳузуридаги департаментнинг Элликқалъа ва Тўрткўл тумани бўлимлари томонидан ЭТК ходимлари билан ҳамкорликда ўтказилган терговга қадар текширувларда аниқланган. “Т.Р.” ва “О.С.” фермер хўжаликлари масъул шахслари қуввати 90 ва 11 кВт бўлган сув насосларини умумий фойдаланишдаги электр тармоқларига ўзбошимчалик билан улаб, жами 180,4 миллион сўмлик электр энергиясидан ноқонуний фойдалангани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Жиззах вилояти Зомин туманида электрдан ноқонуний фойдаланган фермер хўжалиги масъуллари давлатга 200 миллион сўмдан зиёд зарар етказган эди.
Шунингдек, Наманган вилояти Уйчи туманида электрдан ноқонуний фойдаланган фермер хўжалиги раҳбари давлатга 200 миллион сўм зарар етказгани хабар қилинганди.
Изоҳ (0)