АҚШ президентлигига Демократлар партиясидан номзод Камала Ҳарриснинг сайловолди фондига бир ҳафтада 200 миллион доллардан ортиқ маблағ келиб тушди. Бу ҳақда AP News манбаси хабар берди.
Ҳаррис президентликка ўз номзодини қўйганидан бери йиғилган хайрия маблағлари қиймати чорак миллиард долларга яқинлашган. Расмийлар келгуси ҳафталардаги хайрия кампанияси янада кўпроқ маблағ жалб қилиши мумкинлигини билдирган.
Ҳаррис фонди сайловолди кампанияларини ташкил этиш учун йиғилган маблағлар ҳисобидан штатларда кўнгиллилар гуруҳларини ташкил этган. Ҳозирда бутун мамлакатда 170 мингдан ортиқ шахслар Демократлар номзоди учун сайловолди тарғибот тадбирларини амалга оширишда ёрдам бериш учун рўйхатдан ўтган.
Якшанба куни йиғилган маблағлар борасида ўзининг сўнгги ҳисоботини эълон қилган Ҳаррис фонди хайрия ўтказмаларининг 66 фоизи янги ҳомийлардан келганини билдирган. Унга кўра, Байденнинг пойгадан чиқиши ва ўрнига Ҳаррис тайинланиши ортидан ҳомийларда Демократлар дастурига нисбатан ишонч кучайиб кетган. Бу эса Байден учун самарасиз ишлаган хайрия кампаниясини фаоллаштириб юборган.
“Вице-президент Ҳаррис пойгасида жадаллик ва энергия кучаймоқда. Аслида ҳам бу икки омил президентлик пойгаси асосини ташкил қилади. Сайловлар жуда қизғин бўладиган кўринади”, деган Ҳаррис сайловолди кампаниясининг алоқа бўйича директори Майк Тайлер.
Камала Ҳарриснинг сайловолди штаби сўнгги ҳафтада АҚШ бўйлаб 2300 га яқин тарғибот тадбирлари ташкил этган. Ҳарриснинг пойгаси Трампга нисбатан кеч бошлангани сабаб Демократлар кўпроқ тарғиботга урғу бермоқда.
Изоҳ (0)