Ўзбекистонликлар қайси давлатларга доимий яшаш учун кўпроқ кўчиб кетаётгани маълум қилинди

Статистика агентлиги мамлакат аҳолисининг 2023 йилдаги демографик ҳолати бўйича пресс–релиз эълон қилди.

Маълум қилинишича, ўтган йилнинг январь–декабрь ойларида Ўзбекистондан хорижий мамлакатларга кўчиб кетганлар сони 17 336 кишини ташкил этди. Шундан 8 270 нафари (47,7 фоиз) эркаклар, 9 066 нафари аёллар (52,3 фоиз).

Республикадан хорижий мамлакатларга кўчиб кетганларнинг асосий қисми Қозоғистон (81,1 фоиз), Россия (15,4 фоиз), Жанубий Корея (0,6 фоиз), Қирғизистон (0,5 фоиз), Туркманистон (0,2 фоиз) ва бошқа мамлакатлар (2,2 фоиз) ҳиссасига тўғри келган.

Шу билан бирга, йил давомида Ўзбекистонга хорижий мамлакатлардан кўчиб келганлар сони 2 955 кишини ташкил этди. Шундан 1 473 нафари эркаклар (49,8 фоиз), 1 482 нафари (50,2 фоиз) аёллар.

Агентлик ҳисоб–китобида 2023 йилнинг январь–декабрь ойларида Ўзбекистон бўйича кўчиб кетганлар сони 233 200 кишини ташкил этган. Ўтган йилда республика бўйича кўчиб кетганлардан 81,4 фоизи меҳнатга лаёқатли ёшдагилар ҳисобланади. Шу билан бирга, 10,1 фоизи меҳнатга лаёқатли ёшдан кичиклар, 8,5 фоизи меҳнатга лаёқатли ёшдан катталар ҳиссасига тўғри келган.