Toshkentda 2024-yilning o‘tgan davri davomida daraxtlarning noqonuniy kesilishi bilan bog‘liq 87 ta holat aniqlanib, tabiatga jami 817,3 million so‘m zarar yetkazilgan.
Oliy Majlis Senatining 54-yalpi majlisida parlament nazorati doirasida Toshkent shahrida tadbirkorlikni rivojlantirish va ekologik vaziyatni yaxshilash yuzasidan amalga oshirilgan ishlar holati ko‘rib chiqilgandi.
Ma’lum bo‘lishicha, ekologik vaziyatni yaxshilash yuzasidan “Yashil makon” umummilliy loyihasining bahorgi ko‘chat ekish mavsumi doirasida Toshkent shahrida 700 ming donaga yaqin manzarali, mevali daraxt va buta ko‘chatlari va qalamchalari ekilgan. Shuningdek, “Yashil makon” umummilliy loyihasi doirasida 12 ta tuman hokimliklari tomonidan 20,47 gektar maydonda 26 ta hokimlik yashil bog‘lari, har bir tumanda “Kashtan ko‘chasi”, “Chinor ko‘chasi”, “Eman ko‘chasi”, “Lola daraxti ko‘chasi” kabi namunaviy ko‘chalar tashkil etilgan.
Chiqindilarni boshqarish bo‘yicha Toshkent shahrida mavjud 585 ta MFY to‘liq sanitar xizmat ko‘rsatish bo‘yicha qamrab olingan. Shaharda aholidan umumiy hisobda mart oyigacha 363,2 ming kub metr qattiq maishiy chiqindilar olib chiqib ketilgan.
2024-yilning o‘tgan davrida shaharda yangi qurilayotgan hamda faoliyat olib borayotgan sanoat va boshqa ishlab chiqarish korxonalariga jami 1 057 ta davlat ekologik ekspertiza xulosalari taqdim qilingan.
Senatorlar tomonidan shaharda ekologik vaziyatni yaxshilashda yo‘l qo‘yilgan kamchiliklar masʼul vazirlik va idoralarga ko‘rsatib o‘tildi hamda ekologiya sohasida mavjud talablar bajarilishini taʼminlashga qaratilgan zarur choralar ko‘rish yuzasidan takliflar bildirildi.
Izoh (0)