BBC шарҳловчисининг рафиқаси ва икки қизи ўз уйида ўлик ҳолда топилди

BBC шарҳловчиси Жон Хантнинг рафиқаси ва икки қизи уйда арбалет билан отиб кетилди.

Керол Хант (61), Ханна Хант (28) ва Луиза Хант (25) жиддий жароҳатлар билан Хертфордширдаги уйидан топилган. Оиланинг уч аъзоси ҳам воқеа жойида вафот этган.

Полиция 26 ёшли Кайл Клиффордни қидирмоқда, у Хертфордширда ёки шимолий Лондонда яширинган бўлиши мумкин. Гумонланувчи арбалет билан қуролланган.

Клиффорд Британия армиясида хизмат қилган, у 2022 йилда нафақага чиққан.

“Бугунги кунда бизнинг асосий мақсадимиз одамларни ҳимоя қилиш ва учта аёлнинг ўлдирилишида гумон қилинаётган Кайл Клиффордни топишдир, биз буни режалаштирилган қотиллик деб ҳисоблаймиз”, —деди полиция вакили Жон Симпсон.

Жон Хант — BBC ва Скй телеканаллари шарҳловчиси. У от пойгаларини шарҳлаган.