Жанубий Корея ҳарбийлари Шимолий Корея билан чегара ҳудудида назорат тизимини кучайтириш учун лазерли қуроллар ўрнатади. Бу ҳақда Корея яримороли манбаларига таяниб, Reuters нашри хабар берди.
Лазерли қуролларни жойлаштиришдан мақсад чегара зонасида Шимолий Кореянинг учувчисиз қурилмаларини уриб тушириш эканлиги айтилган. Агар бу амалга ошса, Жанубий Корея лазерли ҳужум қуролларини ҳарбий соҳага татбиқ қилган дунёдаги биринчи мамлакатга айланади.
Мамлакат қурол-яроғ харидлари агентлиги 11 июль куни лазерли қурилмалар ҳақидаги хабарларни тасдиқлаган. Жанубий Корея ўзининг лазер дастурини “Юлдузли жанги лойиҳаси” деб атаган.
Жанубий Корея ҳарбийлари янги дастурни амалга ошириш учун Hanwha Aerospace компанияси билан ҳамкорликни йўлга қўйган. Мудофаа вазирлиги лойиҳа учун алоҳида бюджет пакети ташкил этган. Лазерли қуроллар ўрнатилгач, улар воситасида ҳаво қурилмаларига бериладиган ҳар бир алоҳида зарба 2000 вон (1,45 доллар)га тушади.
“Мамлакатимиз лазер қуролларини жойлаштирган ва ишлатадиган дунёдаги биринчи давлатга айланмоқда. Эндиликда Шимолий Кореянинг дрон провокацияларига қарши ҳарбийларимизнинг жавоб бериш имкониятлари янада кучайтирилади”, дейилади Сеул расмийлари хабарида.
Қуроллар бўйича мутахассис айтишича, янги лазерли ускуналар 10-20 сония давом этадиган тўлқин зарби орқали электр ва ёқилғи асосида ишлайдиган ҳар қандай қурилмани ёқиб юбора олади.
АҚШнинг RAND корпорацияси нотижорат-таҳлилий маркази маълумотларига кўра, Жанубий Корея, Хитой ва Буюк Британия каби давлатлар лазер қуролларини ишлаб чиқиш ва жойлаштириш учун курашмоқда. Дунёнинг бошқа кўплаб мамлакатларида ҳам учувчисиз тизимларнинг тарқалишига қарши туриш, шунингдек, парвоздаги ракеталарни ёки орбитадаги сунъий йўлдошларни нишонга олиш учун ушбу қуролларга катта қизиқиш бор.
Изоҳ (0)