Хориж валютасини ноқонуний олиб ўтаётган ўзбекистонлик Ҳиндистонда ҳибсга олинди

192 минг АҚШ долларини ноқонуний олиб ўтаётган Ўзбекистон фуқароси Индира Ганди халқаро аэропортида Марказий саноат хавфсизлик кучлари (CISF) томонидан қўлга олинди. Бу ҳақда Тhе Nеw Indian Eхрrеss хабар берди.

Айбланувчи П.Д. божхона ходимларига топширилган. 7 июль куни соат тахминан 22:10 да IGI аэропорти 3-терминалининг CISF кузатув ва разведка хизмати ходимлари рўйхатдан ўтиш жойида йўловчининг шубҳали ҳаракатларини пайқаган.

Тошкентга учаётгани тахмин қилинган йўловчи ярим тунда “Ўзбекистон ҳаво йўллари” рейси билан жўнаши керак бўлган.

Юкни синчковлик билан текшириш мақсадида гумонланувчи тасодифий назорат пунктига йўналтирилган. Хавфсизлик ходимлари унинг юкини текширганда у ўз юкларини бошқа йўловчига топширишга уринган.

“У иммиграция назорат қисмида ўзини бетоб қилиб кўрсатган ва ҳожатхонага борган, у ерда бортга чиқиш талонини оқизиб юборган”, дейди расмий.

Йўловчи зудлик билан хавфсизлик ходимлари томонидан қўлга олиниб, божхонанинг жўнаб кетиш бошқармасига келтирилган.

Божхона ходимлари иштирокида синчиклаб текширилганда, айбланувчининг юклари орасида, хусусан, ёстиқ жилдлари, чойшаблар ва аёллар кийимлари ичига яширилган умумий қиймати тахминан 192 минг АҚШ доллари (қарийб 16 миллион ҳинд рупийси) миқдорида пуллар борлиги аниқланган.