Қирғизистон Миллий хавфсизлик давлат қўмитаси Ўш вилояти бошқармаси томонидан 17 апрель куни ўтказилган тадбирда икки нафар Ўзбекистон фуқароси қўлга олинди. Бу ҳақда қўмита матбуот хизмати хабар берди.
Қайд этилишича, улар Ўзбекистон ҳудудида тақиқда бўлган “Тавҳид ва жиҳод катибаси” террорчилик ташкилотининг Истанбул бўлинмасига аъзоликда гумонланмоқда.
Маълумотга кўра, М.З. ҳамда М.Ф. Қирғизистонга ноқонуний йўллар орқали кириб келган ва сохта ҳужжатлар тайёрлатиб, мамлакатдан чиқиб кетишни режалаштирган. Ҳозирда мазкур ҳолат юзасидан тергов ҳаракатлари олиб борилмоқда.
Февраль бошларида Интерполнинг Ўзбекистондаги Миллий марказий бюроси ходимлари бошчилигида диний-экстремистик фаолиятга алоқадорлиги учун қидирилаётган жиноятчи Кишинёв шаҳридан Тошкентга етказилганди. Шунингдек, Наманганда Telegram орқали экстремистик ғояларни тарғиб қилган шахсга жиноят иши қўзғатилгани, Фарғонадан туриб Суриядаги террористик ташкилотни молиялаштирмоқчи бўлган шахслар озодликдан маҳрум этилгани тўғрисида хабар берилганди.
Изоҳ (0)