Бирлашган Миллатлар Ташкилоти Хавфсизлик Кенгаши Суданнинг Ал-Фашир шаҳридаги катта йўқотишларга олиб келган ҳужумни тўхтатишга чақирди. Бу ҳақда UN News манбаси эълон қилган баёнотга асосланиб, Al Jazeera хабар бермоқда.
Манбада айтилишича, Суданнинг Шимолий Дарфур вилояти маркази ҳисобланган Ал-Фашир шаҳрида мамлакат армияси ва Тезкор қўллаб-қувватлаш кучлари ўртасида жанглар авжига чиққан. Тинч аҳоли орасида кўплаб қурбонлар кузатилган.
БМТ резолюцияси Судан ҳарбийлари ва Тезкор қўллаб-қувватлаш кучларини тинч аҳоли ҳимоясини таъминлашга ва зўравонликни зудлик билан тўхтатишга чақирган. Талаб бажарилмаса, халқаро аралашув хавфи ҳақида огоҳлантирилган.
Пайшанба куни, 13 июнь куни эълон қилинган резолюцияга Россия бетараф муносабат билдирган. Хавфсизлик Кенгашининг қолган 14 аъзоси эса уни қўллаб-қувватлаган. Резолюция ўт очишни тўхтатиш талабини асосан Тезкор қўллаб-қувватлаш кучлари раҳбарияти олдига қўйган.
БМТ Суданда зўравонлик кўлами бутун мамлакат бўйлаб паст суръатда давом этаётганини билдирган. Кўплаб вилоятлар ҳудудида “этник сабабларга кўра зўравонлик” амалга оширилаётгани ҳақида хабар берилган.
Маълумот ўрнида, Судандаги ҳарбий можаро 2023 йилнинг апрель ойида генерал Абдул Фаттоҳ ал-Бурҳон бошчилигидаги Судан Қуролли Кучлари (САF) ва генерал Муҳаммад Ҳамдан “Ҳемедти” Дагалога содиқ бўлган Тезкор қўллаб-қувватлаш кучлари ўртасида бошланган эди.
БМТ ҳисоб-китобларига кўра, зўравонликлар ҳозирга қадар камида 14 минг кишининг ҳаётига зомин бўлган. 10 миллиондан ортиқ одам бошпанасиз қолган.
Изоҳ (0)