Суданнинг Шимолий Дарфур вилоятида 10 майда бошланиб ҳозирга қадар давом этаётган фаол жанглар оқибатида камида 134 фуқаро ҳалок бўлган. Бу ҳақда “Чегара билмас шифокорлар” ташкилоти ҳисоботига асосланиб, CNN нашри хабар берди.
Фаол отишмалар асосан Шимолий Дарфур маркази Ал-Фашир шаҳрида юз берган. Энг кўп қурбонлар ҳам шу шаҳарда кузатилгани хабар қилинган.
Манбада айтилишича, 10 май куни Ал-Фашир марказидаги бозор яқинида қуролли гуруҳлар отишма бошлаган. Маҳаллий аҳоли ҳудуддан тезда эвакуация қилинган. Тинч аҳолига оммавий ўқ узиш ҳолатлари кузатилган.
“Биз уришаётган томонларни ҳаётдан кўз юмаётган тинч аҳоли вакилларини ҳимоя қилиш учун кўпроқ саъй-ҳаракат қилишга чақирамиз”, — дейилган “Чегара билмас шифокорлар” ташкилоти ҳисоботида.
Жанглар бошланган икки ҳафтадан кўпроқ муддатда 979 киши жароҳатланиб, касалхоналарга ётқизилган. Расмийлар Ал-Фаширдаги тиббиёт муассасалари беморлар билан тўла эканини маълум қилган.
Тезкор ҳаракат кучлари Ал-Фашир шаҳрини қуршаб олгани маълум қилинган. Ушбу гуруҳ томонидан эгалланган тўрт штатдан қочган аҳоли Шимолий Дарфур ва унинг марказий қисмларига келиб жойлашган.
UNICEF маълумотларига кўра, ҳозирга қадар Шимолий Дарфур марказидан камида 500 минг киши кўчириб кетилган. Озиқ-овқат, дори-дармон ва бошқа маҳсулотлар ниҳоятда кам қолган. Дарфурда озиқ-овқат ёрдами етказиб бериш тўхтаб қолган. Жаҳон озиқ-овқат дастури минтақада 1,7 миллион киши фавқулодда очлик даражасини бошдан кечираётганини маълум қилган.
Маълумот ўрнида, Суданда мамлакат армияси ва Тезкор ҳаракат кучлари қарама-қаршилиги 2023 йилнинг апрель ойида фуқаролар урушини келтириб чиқарди. БМТнинг Гуманитар масалаларни мувофиқлаштириш бошқармаси маълумотларига кўра, уруш бошланганидан бери 8,8 миллиондан ортиқ суданлик ўз уйини ташлаб кетган. 25 миллионга яқин фуқаро ёрдамга муҳтож.
Изоҳ (0)