Туркия Исроилнинг агрессив сиёсатига қарши Ливанни қўллаб-қувватлайди. Бу ҳақда Туркия президенти Ражаб Тоййиб Эрдўғоннинг баёнотига асосланиб, Anadolu нашри хабар берди.
Манбада айтилишича, Туркия раҳбари 26 июнь куни Ливан бош вазири Нажиб Микати билан телефон орқали мулоқот қилган. Мулоқотда икки мамлакатнинг ўзаро ҳамкорлик масалалари ҳақида фикр ва мулоҳаза алмашилган.
Учрашувда, шунингдек, Туркия етакчиси Эрдўғон Ливанни халқаро кескин вазиятда қўллаб-қувватлашини билдирган. Исроил агрессиясига қарши Туркия Ливан томонида туриши таъкидланган.
Давлат раҳбарлари мулоқотда Исроил ҳужумлари, Ливанга таҳдидлар ва, шу билан бирга, Ғазодаги можаро масаласини ҳам муҳокама қилган. Туркиянинг Яқин Шарққа ёрдами масаласи кўриб чиқилган.
“Президент Эрдўғон Исроилнинг тажовузкорлигини зудлик билан тўхтатиш зарурлигини таъкидлаб, Исроилнинг можароларни кучайтиришга қаратилган саъй-ҳаракатлари ўта хавфли эканлигини айтди”, — дейилади Туркия президенти матбуот хизмати хабарида.
Манбада айтилишича, Анқара Исроилнинг агрессив сиёсатига қарши Байрут билан бирга курашади. Бу борада ҳар қандай ёрдам беришга тайёр ва шай.
“Президент Эрдўғон халқаро ҳамжамият ва ислом оламининг минтақавий ва глобал тинчликка таҳдид солаётган Исроилга ‘бас’ дейиш вақти келганини таъкидлади”, — дейилади Туркия хабарида.
Изоҳ (0)