Роберт Де Ниро 70 йиллардан бери энг машҳур актёрлар рўйхатидан тушмайди. Бир пайтлар The Guardian нашри у “Леонардо Ди Каприо, Бред Питт ва Дэниэл Дай-Льюис каби замонавий юлдузларни ортда қолдириши мумкин” деб ёзганди. Актёрнинг ҳаётида сиз билмаган қизиқарли дақиқалар кўп бўлган.
Рассомларнинг ўғли
Роберт Де Ниро 1943 йил 17 августда Нью-Йоркда туғилган. У рассом отасининг номи билан аталган, онаси Виржиния ҳам суратлар чизган. 1945 йилда Робертнинг ота-онаси ажрашади ва бола онасида қолади. У кўплаб ижодкорлар билан мулоқотда бўлгани учун кичкина Боббининг санъат асосларини ўрганишдан бошқа иложи қолмайди.
10 ёшида у маҳаллий спектакл “Оз сеҳргари”да Қўрқоқ шер ролини ўйнайди ва ўзини ёш актёр сифатида кўрсатади. Мактабдан сўнг Олий мусиқа, санъат ва ижро мактабида таҳсилни давом эттиради. Ўқитувчиларидан у Станиславский таълимини олган — Де Ниро ҳозиргача деталларга эътибор бериб, эҳтиёткорлик билан муносабатда бўлиши билан танилган.
Ҳақиқий такси ҳайдовчиси
Роберт “Таксичи” (1976) фильмидаги бош ролга тасдиқланганида, у бир неча ҳафта давомида 12 соатлик сменада Нью-Йорк кўчаларида таксичилик қилади. Актёр мазкур роли учун “Оскар” мукофотига номзод бўлган. Айтганча, у икки марта “Оскар” билан мукофотланган: “Чўқинтирган ота” ва “Қутурган буқа” фильмидаги роллари учун.
“Қутурган буқа” фильмидаги роли учун Роберт бир неча ой ичида фастфудлар ёрдамида деярли 30 килога семиради. Суратга олиш ишлари тугагандан сўнг, у дарҳол вазн ташлайди.
Де Ниро ҳар бир фильмда қаҳрамонинг ҳаётини яшаб ўтади. Энг ёрқин мисол Скорсезенинг “Қўрқув кўрфази” (1991) фильмидаги бош ролдир. Роли учун актёр 5000 долларга тишларини чархлатиб ташлаган, ҳолбуки грим ёрдамида буни қилиш мумкин эди. “Мен ҳар доим қаҳрамонга сингиб кетиш учун тананинг мумкин бўлган хусусиятларидан фойдаланиш кераклигини айтаман”, дейди актёр бу қарорига жавобан. Тасвирга олиш ишлари тугагач, тиш шифокорига 20 минг доллар тўлаб, тишларини даволатади. Натижада Де Ниро яна бир “Оскар” номинациясини олади.
Деярли италян
Де Ниронинг аждодлари Америкага Италиядан кўчиб келишган. Айтганча, фамилиясидаги “ди” қўшимчаси ҳужжатлардаги хато туфайли “де”га айланиб кетаган.
2004 йилда актёрлик хизматлари учун унга Италия фуқаролигини бериш ҳақида гап кетганда, Американинг “Италия ўғиллари” жамияти бунга кескин қарши чиқишади. Айтишларича, актёр доимий равишда италян гангстерларини ўйнайди ва фильмларда мамлакатнинг нотўғри образини яратади. Де Ниронинг ўзи бошқача фикрда: “Мен ўйнаган роллар ҳаётдаги реал одамлар. Улар бор, демак, улар бошқалар каби экранда пайдо бўлиш ҳуқуқига эга”. Охир-оқибат унга фуқаролик берилади.
Фақатгина суратга олиш майдончасида эмас
Де Ниро фаол суратга тушишда давом этмоқда: масалан, ўтган йили у “Ирландиялик” фильмида бош ролни ва “Joker” фильмида иккинчи даражали ролни ўйнади. Иккала фильм ҳам кўплаб мукофотларга сазовор бўлган.
Кинодан ташқари Ниронинг бизнеслари ҳам бор. 1994 йилда Де Ниро Nobu ресторанлар тармоғига асос солган ва бугунги кунга қадар дунёда улардан 38 таси ва 8 та меҳмонхона мавжуд.
Бироқ актёрнинг бойлигига унинг иккинчи хотини Грэйс Хайтауэр катта зарар етказади. Улар 1997 йилда турмуш қуришади, беш йилдан сўнг ажрашмоқчи бўлишади, лекин қарорларини ўзгартиришади. 2018 йил охирида Роберт ва Грэйс ажрашади, бироқ расмий ажралиш ҳали берилмаган.
Эр-хотинга яқин манбаларга кўра, асосий муаммо Грэйснинг ҳамма нарсага пул сарфлаш истагида. Иккинчиси, уларнинг тўнғич ўғли 21 ёшли Элиотда аутизм спектрининг бузилиши ташхиси қўйилган. Айтганча, Робертнинг учта аёлдан жами беш нафар фарзанди бор.
Изоҳ (0)