Покистон шимоли-ғарбида 21 июнь куни юз берган портлаш оқибатида беш нафар ҳарбий ҳалок бўлди. Бу ҳақда Arab News нашри хабар берди.
Манбада айтилишича, портлаш Хайбер-Пахтунхва вилоятида юз берган. Куррам туманида хавфсизлик кучлари ходимларини олиб кетаётган машина номаълум қуролдан ўққа тутилган.
Ҳужум оқибатида машина портлаб кетган. Унинг ичида бўлган 5 нафар ҳарбий кучли даражада куйиш белгилари билан ҳалок бўлган.
Покистон армияси ушбу ҳудудда террорчиларни йўқ қилиш учун махсус операцияси ўтказаётгани айтилган. Жиноятчилар тез фурсатда топилиши ва жавобгарликка тортилиши маълум қилинган.
“Покистон хавфсизлик кучлари терроризм таҳдидини йўқ қилишга қатъий қарор қилди. Жасур аскарларимизнинг бундай қурбон бўлиши эса бизнинг қатъиятимизни янада мустаҳкамлайди”, — дейилган Покистон қуролли кучлари қаноти матбуот бўлими эълон қилган баёнотда.
Мамлакат президент Осиф Али Зардорий портлашни кескин қоралаган. Президент шаҳидларнинг бурч ва ватанпарварлик туйғусини ҳамда мамлакатдан жангариларни йўқ қилишда хавфсизлик кучларининг ролини юқори баҳолаган. Қурбонларнинг оила аъзоларига ҳамдардлигини изҳор қилган.
Ҳужум учун жавобгарликни ҳеч бир гуруҳ ўз бўйнига олмаган. Шунга қарамай Исломободнинг бир қатор расмийлари теракт ташкилотчиси сифатида “Таҳрики Толибон”ни айблаган.
Сўнгги бир неча ойда Покистоннинг Афғонистон билан чегарадош Хайбер-Пахтунхва вилоятида кўплаб терактлар кузатилди. Покистон бу терактларни Афғонистон шарқидан яширинча кириб келган жангарилар уюштирганини даъво қилган. Жорий йилнинг 11 июнь куни бутун Хайбер-Пахтунхва вилоятида терроризмга қарши оммавий кураш махсус операциялари бошланган.
Изоҳ (0)