Тиш импланти — йўқотилган тиш ўрнини тиклайдиган, жағ суягига жойлаштириладиган ва титан металидан тайёрланган мослама ҳисобланади. У бир ва бир нечта тишлар йўқотилган ёки тўлиқ тишсизлик ҳолатларида қўлланилади. Имплантнинг афзаллиги шундаки, йўқотилган тиш ўрнини тиклаш учун унинг ёнидаги тишлар бутунлиги сақлаб қолинади. Ушбу мосламани 14-15 ёшдан 70-80 ёшгача бўлган беморларга ўрнатиш мумкин.
Операциядан аввал нималар мумкин ва мумкин эмас?
Тиш имплантациясига тайёргарлик бошқа стоматологик операциялар ҳамда умумий жарроҳлик амалиётидан деярли фарқ қилмайди. Жараёндан бир неча соат аввал тўйиб овқатланиш, етарлича сув ичиш лозим, чунки имплант ўрнатиш операциясидан кейин камида 2-3 соат давомида озиқ-овқат ва ичимликлар истеъмоли чекланади. Шунингдек, муолажадан аввал спиртли ичимлик ичиш қатъиян тақиқланади.
Операция куни спорт билан шуғулланмаслик ва жисмоний фаолиятни бир неча кунга тўхтатиб туриш лозим. Шунингдек, операциядан бир неча соат аввал чекиш ҳам мумкин эмас. Бу тақиқ никотин билан эмас, балки оғиз бўшлиғидаги юмшоқ тўқималарнинг ишемизацияси билан боғлиқ. Ишемизация деганда қон айланишининг бузилиши натижасида жарроҳлик амалиётидан сўнг тўқималар тикланишининг узоқ ва ёмон кечишидир.
Имплант ўрнатиш операциясига тайёргарлик
Аввало жарроҳ ва стоматолог беморни визуал текширувдан ўтказади ва керакли таҳлилларни олади, сўнг шифокор ҳозир ва аввал қандай шикоятлар бўлганлиги, сурункали касалликлар бор ёки йўқлиги ҳамда доимий равишда бирор дори воситасини қабул қилаётганини текширади. Кейин эса аниқ ташхис қўйиш ва имплантацияга тайёргарлик кўриш учун компьютер томографияси ўтказилади.
Фойдали маслаҳат: стоматология клиникасини танлашда ўзининг компьютер томографияси мавжуд бўлган тиббиёт масканига бориш афзалроқ. Шунда сиз бир неча кун вақтингизни ҳамда маблағни тежайсиз.
Нима учун операциядан аввал компьютер томографияси ўтказилади?
Ушбу амалиёт оғиз бўшлиғидаги барча тузилмаларнинг юқори аниқликдаги ва батафсил 3D тасвиридир. Шифокор тасвир орқали тишларнинг илдизлари қаерда жойлашганлигини, яллиғланиш жараёнлари, кисталар мавжудлигини аниқлайди ва олинган маълумотлар асосида жарроҳлик техникасини, имплантлар турини танлайди.
Операциядан кейин нима қилиш керак?
Операциядан кейин тикланиш даври ўртача 3 кундан 2 ҳафтагача давом этадиган. Бу давр имплантлар сони жарроҳлик аралашувининг ҳажмига боғлиқ. Имплантациядан сўнг иссиқ душ, иссиқ ванналар қабул қилиш, сауналар ва солярийга бориш тақиқланади. Чунки улар қон кетишига ва шишлар пайдо бўлишига олиб келади.
Жарроҳликдан камида 3 соат давомида чекиш ман этилади. Спиртли ичимликларни 4-6 кун давомида ичиш мумкин эмас. Илк кунларда жисмоний фаоллик, спорт ва оғир меҳнатни ҳам чеклаш зарур.
Изоҳ (0)