Tish implanti — yo‘qotilgan tish o‘rnini tiklaydigan, jag‘ suyagiga joylashtiriladigan va titan metalidan tayyorlangan moslama hisoblanadi. U bir va bir nechta tishlar yo‘qotilgan yoki to‘liq tishsizlik holatlarida qo‘llaniladi. Implantning afzalligi shundaki, yo‘qotilgan tish o‘rnini tiklash uchun uning yonidagi tishlar butunligi saqlab qolinadi. Ushbu moslamani 14-15 yoshdan 70-80 yoshgacha bo‘lgan bemorlarga o‘rnatish mumkin.
Operatsiyadan avval nimalar mumkin va mumkin emas?
Tish implantatsiyasiga tayyorgarlik boshqa stomatologik operatsiyalar hamda umumiy jarrohlik amaliyotidan deyarli farq qilmaydi. Jarayondan bir necha soat avval to‘yib ovqatlanish, yetarlicha suv ichish lozim, chunki implant o‘rnatish operatsiyasidan keyin kamida 2-3 soat davomida oziq-ovqat va ichimliklar iste’moli cheklanadi. Shuningdek, muolajadan avval spirtli ichimlik ichish qat’iyan taqiqlanadi.
Operatsiya kuni sport bilan shug‘ullanmaslik va jismoniy faoliyatni bir necha kunga to‘xtatib turish lozim. Shuningdek, operatsiyadan bir necha soat avval chekish ham mumkin emas. Bu taqiq nikotin bilan emas, balki og‘iz bo‘shlig‘idagi yumshoq to‘qimalarning ishemizatsiyasi bilan bog‘liq. Ishemizatsiya deganda qon aylanishining buzilishi natijasida jarrohlik amaliyotidan so‘ng to‘qimalar tiklanishining uzoq va yomon kechishidir.
Implant o‘rnatish operatsiyasiga tayyorgarlik
Avvalo jarroh va stomatolog bemorni vizual tekshiruvdan o‘tkazadi va kerakli tahlillarni oladi, so‘ng shifokor hozir va avval qanday shikoyatlar bo‘lganligi, surunkali kasalliklar bor yoki yo‘qligi hamda doimiy ravishda biror dori vositasini qabul qilayotganini tekshiradi. Keyin esa aniq tashxis qo‘yish va implantatsiyaga tayyorgarlik ko‘rish uchun kompyuter tomografiyasi o‘tkaziladi.
Foydali maslahat: stomatologiya klinikasini tanlashda o‘zining kompyuter tomografiyasi mavjud bo‘lgan tibbiyot maskaniga borish afzalroq. Shunda siz bir necha kun vaqtingizni hamda mablag‘ni tejaysiz.
Nima uchun operatsiyadan avval kompyuter tomografiyasi o‘tkaziladi?
Ushbu amaliyot og‘iz bo‘shlig‘idagi barcha tuzilmalarning yuqori aniqlikdagi va batafsil 3D tasviridir. Shifokor tasvir orqali tishlarning ildizlari qayerda joylashganligini, yallig‘lanish jarayonlari, kistalar mavjudligini aniqlaydi va olingan ma’lumotlar asosida jarrohlik texnikasini, implantlar turini tanlaydi.
Operatsiyadan keyin nima qilish kerak?
Operatsiyadan keyin tiklanish davri o‘rtacha 3 kundan 2 haftagacha davom etadigan. Bu davr implantlar soni jarrohlik aralashuvining hajmiga bog‘liq. Implantatsiyadan so‘ng issiq dush, issiq vannalar qabul qilish, saunalar va solyariyga borish taqiqlanadi. Chunki ular qon ketishiga va shishlar paydo bo‘lishiga olib keladi.
Jarrohlikdan kamida 3 soat davomida chekish man etiladi. Spirtli ichimliklarni 4-6 kun davomida ichish mumkin emas. Ilk kunlarda jismoniy faollik, sport va og‘ir mehnatni ham cheklash zarur.
Izoh (0)