Malina dunyodagi eng keng tarqalgan va yuzlab shifobaxsh xususiyatlarga ega rezavordir. U butalarda o‘sadi va turli rangdagi navlarda uchraydi. Iyun va avgust oylari malina uchun pishiqchilik davri bo‘lib, mavsumiy rezavorni iste’mol qilish har qanday yoshdagi shaxslar uchun foydalidir. Malinadan turli shirinliklar, murabbo, smuzi, jem kabi desertlar tayyorlash mumkin. Ushbu mevada ko‘plab vitaminlar, minerallar, o‘simlik tolalari va antioksidantlar mavjud.
Malinaning foydali xususiyatlari
Shamollashda yordam beradi
Ushbu rezavor superfud hisoblanib, turli kasalliklarning oldini olish va davolashda qo‘llanadi. Masalan, malinadagi antioksidantlar va fitonutriyentlar immunitetni oshiradi, salitsil va foliy kislotalari O‘RVIdan tezroq xalos bo‘lishga yordam beradi. Darvoqe, shamollashga qarshi malinali murabbodan choy tayyorlaganda uni qaynoq suvga emas, balki o‘rtacha issiqlikdagi suvga solish lozim, aks holda malinaning foydali xususiyatlari yo‘qoladi.
Qandli diabetning oldini oladi
Malina qand kasalligiga chalinish xavfini kamaytirishi va insulin miqdorini tushirishi mumkinligi olimlar tomonidan aniqlangan. Malina tarkibidagi marganets suyaklar va teri salomatligini ta’minlash uchun zarurdir. Shuningdek, ushbu rezavordagi o‘simlik tolalari 2-toifali qand kasalligi rivojlanishining oldini oladi.
Ko‘z nuri uchun foydali
Tadqiqotlar shuni ko‘rsatadiki, malinada mavjud bo‘lgan zeaksantin nomli antioksidant ko‘zdagi sariq dog‘ degeneratsiyasi (ko‘rish qobiliyatining yomonlashishiga olib keladigan kasallik) rivojlanish xavfini kamaytirishga yordam beradi. Malinadagi C vitamini katarakta (ko‘z gavharining xira tortishi)dan himoya qiladi.
Ovqat hazm qilish tizimini yaxshilaydi
Malina o‘simlik tolalariga boy meva bo‘lib, 100 gramm mahsulot 6,5 gramm kletchatkani o‘z ichiga oladi. Ular oshqozon-ichak salomatligini yaxshilaydi, qabziyatning oldini oladi hamda ichaklarda foydali bakteriyalarning ko‘payishiga yordam beradi.
Miya faoliyatini yaxshilaydi
Olimlarning xulosasiga ko‘ra, malina tarkibidagi flavonoidlar xotirani kuchaytiradi, diqqatni yaxshilaydi, demensiya, Alsgeymer va Parkinson kasalligining rivojlanish xavfini kamaytiradi.
Kamqonlikning oldini oladi
Malina temir moddasiga boy rezavordir. U qondagi gemoglobin darajasini oshirishga va anemiyaning oldini olishga yordam beradi.
Yurak salomatligini mustahkamlaydi
Malina qon bosimining oshib ketishidan himoya qiluvchi kaliyga boy. Shuningdek, ushbu rezavor xolesterin miqdorini me’yorda ushlab turadi va yurak-qon tomir kasalliklari uchun xavfli sanalgan semirishdan himoya qiladi.
Saraton xavfini kamaytiradi
Malina tarkibidagi antioksidantlar va yallig‘lanishga qarshi birikmalar (ellagitannin va antotsianin) saratondan himoya qiladi. Ellagitannin saraton hujayralarining ko‘payishiga to‘sqinlik qiladi.
Bundan tashqari, malina ayollar salomatligi uchun ham juda foydali. Malina terida kollagen ishlab chiqarishga yordam beradi, stressdan himoya qiladi, qarish jarayonini sekinlashtiradi hamda gormonlarni muvozanatda saqlaydi.
Malinaning zararli tomonlari
Umuman olganda, ushbu rezavor juda foydali meva bo‘lsa-da, bazi insonlarda allergiya qo‘zg‘ashi, turli dori vositalari bilan ta’sirlashishi mumkin. Xususan, quyidagi turdagi dorilarni qabul qiladigan bemorlar malinadan tiyilishi lozim:
- Stimulyatorlar (amfetamin) qon bosimini oshirib yuboradi;
- Varfarin (tromblarga qarshi) qon ketishiga olib keladi;
- Diabetga qarshi dorilar;
- Aspirin (haroratni tushiruvchi dorilar) organizmda salitsil kislotasi ko‘payib ketishiga va ichki qon ketishiga olib keladi.
Izoh (0)