Хонанда Даврон Эргашев “Дарё”нинг YouTube’даги каналига берган интервьюсида нима учун ўғлининг АҚШнинг футбол клубида тўп суришини истагани ва болалагида ушалмай қолган орзулари ҳақида гапирди.
— Катта ўғлим етти ёшидан буён “Бунёдкор” футбол клубига қатнарди. Айни кўзга кўриниб, экранга чиқадиган ёшида уни АҚШга олиб кетишга қарор қилдим. Ўзбек футболини пастга уриш ниятим йўқ, мен шунчаки ўғлимнинг танилишини хоҳлайман. Осиёга қараганда АҚШда агентлар кўп, у ердан Европа футболига чиқиш анча осон. Ҳамиша “Ўғлим дунё танийдиган футбол юлдузи бўлсин”, деб дуо қиламан. Ўзбек футболчиларининг орасида дунёнинг машҳур клубларида тўп сураётганлар кўп, албатта, бундан қувонаман. Насиб қилса, ҳужжат ишлари ҳал бўлса, ўғлим “Orlando City” клубида тўп суришни бошлайди.
Ўғлимнинг футболга қизиқиши бежиз эмас. Чунки мен ҳам болалигимда спортга жуда қизиққанман. Афсуски, у даврдаги шароитлар бугунгидек эмасди. Янги стадионлар йўқлиги учун дуч келган бўш ерда футбол ўйнаб кетаверардик. Бўйим паст ва сочим жингалак бўлгани учун мени Марадона дейишарди. Аммо ноқулай стадион сабаб кўп жароҳат олардик, ҳамма ерим шилиниб уйга келаверганимдан кейин онам “Футболни йиғиштир, бўлмаса бир еринг майиб бўлади”, деб қаршилик қилган, — дейди хонанда.
Хонанда АҚШдаги тарбиявий муҳит у даражада яхши эмаслиги ва болаларидан хавотир олиши ҳақида гапирди.
— Тўғри, кўп нарса оиладаги тарбияга боғлиқ. Аммо ташқи муҳитнинг ҳам таъсири бўлади. Тан олиш керак, АҚШда улғайган болаларнинг тарбияси бизники билан кескин фарқ қилади. Шу боис кўп ўзбек оилалари ёзги таътил бошланиши билан болаларини Ўзбекистонга юборишади.
Кўп ўзбек биродарларимиз ҳурмат қилиб, оилаларига таклиф қилишади. Борсангиз, боласи на салом беради, на меҳмонга ҳурмат кўрсатади. Чунки у ердаги тарбия шундай. Энг ёмони, таълим тили сабаб ўзбекчани ҳам унутиб юборади. Баъзан у ердаги муҳитни кўриб, одам хавотирга тушади, — дейди хонанда Даврон Эргашев.
Изоҳ (0)