Xonanda Davron Ergashev “Daryo”ning YouTube’dagi kanaliga bergan intervyusida nima uchun o‘g‘lining AQSHning futbol klubida to‘p surishini istagani va bolalagida ushalmay qolgan orzulari haqida gapirdi.
— Katta o‘g‘lim yetti yoshidan buyon “Bunyodkor” futbol klubiga qatnardi. Ayni ko‘zga ko‘rinib, ekranga chiqadigan yoshida uni AQSHga olib ketishga qaror qildim. O‘zbek futbolini pastga urish niyatim yo‘q, men shunchaki o‘g‘limning tanilishini xohlayman. Osiyoga qaraganda AQSHda agentlar ko‘p, u yerdan Yevropa futboliga chiqish ancha oson. Hamisha “O‘g‘lim dunyo taniydigan futbol yulduzi bo‘lsin”, deb duo qilaman. O‘zbek futbolchilarining orasida dunyoning mashhur klublarida to‘p surayotganlar ko‘p, albatta, bundan quvonaman. Nasib qilsa, hujjat ishlari hal bo‘lsa, o‘g‘lim “Orlando City” klubida to‘p surishni boshlaydi.
O‘g‘limning futbolga qiziqishi bejiz emas. Chunki men ham bolaligimda sportga juda qiziqqanman. Afsuski, u davrdagi sharoitlar bugungidek emasdi. Yangi stadionlar yo‘qligi uchun duch kelgan bo‘sh yerda futbol o‘ynab ketaverardik. Bo‘yim past va sochim jingalak bo‘lgani uchun meni Maradona deyishardi. Ammo noqulay stadion sabab ko‘p jarohat olardik, hamma yerim shilinib uyga kelaverganimdan keyin onam “Futbolni yig‘ishtir, bo‘lmasa bir yering mayib bo‘ladi”, deb qarshilik qilgan, — deydi xonanda.
Xonanda AQSHdagi tarbiyaviy muhit u darajada yaxshi emasligi va bolalaridan xavotir olishi haqida gapirdi.
— To‘g‘ri, ko‘p narsa oiladagi tarbiyaga bog‘liq. Ammo tashqi muhitning ham taʼsiri bo‘ladi. Tan olish kerak, AQSHda ulg‘aygan bolalarning tarbiyasi bizniki bilan keskin farq qiladi. Shu bois ko‘p o‘zbek oilalari yozgi taʼtil boshlanishi bilan bolalarini O‘zbekistonga yuborishadi.
Ko‘p o‘zbek birodarlarimiz hurmat qilib, oilalariga taklif qilishadi. Borsangiz, bolasi na salom beradi, na mehmonga hurmat ko‘rsatadi. Chunki u yerdagi tarbiya shunday. Eng yomoni, taʼlim tili sabab o‘zbekchani ham unutib yuboradi. Baʼzan u yerdagi muhitni ko‘rib, odam xavotirga tushadi, — deydi xonanda Davron Ergashev.
Izoh (0)