Киберонколог — сунъий интеллект саратон касаллигини енгишда ёрдам берадими?

Францияда сунъий интеллект (СИ) келиб чиқиши номаълум саратон манбаларини қидирмоқда, дея Euronews хабар берди.

Париждаги Кюри институти саратон касаллигига қарши курашда сунъий интеллектдан фойдаланмоқда. Ундан “бирламчи жойлашуви номаълум саратон” ташхисни қўйиш учун, хусусан, метастазлар танада тарқалганда, анъанавий усуллар ёрдамида қайси орган биринчи бўлиб таъсирланганлигини аниқлаш мумкин бўлмаганда фойдаланилади.

Сунъий интеллект манбани топишга ва мақсадли, самаралироқ даволанишни танлашга ёрдам беради.

Биз СИ ташхисига мутлақо ишонамиз. Касаллик саркома оиласига тегишли эканлиги аниқланди ва илгари бўлмаган даволаш усулларини тақдим этади, — дейди Париждаги Кюри институти онкологи доктор Сара Уоцон.

Маълум бўлишича, СИ алгоритми ўсимтадаги РНК изларини таҳлил қилади ва бу профилни маълум бир орган ёки тўқималарга мослаштиради. Ихтирочиларнинг таъкидлашича, тизим 79 фоиз самарали ва ўз-ўзини ўрганиш қобилияти туфайли келажакда янада такомиллашади.

Беморларни даволаш учун математик ҳамда рақамли усулларни қўллаш тизимимизнинг ҳаракатлантирувчи кучидир, — дея қўшимча қилган онколог.

Францияда “келиб чиқиши номаълум саратон” саратон касаллигининг 3 фоизини ташкил қилади. 

• Сунъий интеллект саратон касаллигига қарши курашда муҳим рол ўйнаши мумкин. СИ ташхис қўйиш, касалликнинг тарқалиш даражасини аниқлаш, беморларнинг индивидуал хусусиятларини ҳисобга олган ҳолда даволаш режалари тузиш ва шахсийлаштирилган тиббиётда самарали ёндашувлар ишлаб чиқиш каби турли усулларда қўлланилади. Масалан, таҳлиллар ва визуал маълумотларни тез ва аниқ таҳлил қилиш, касаллик прогнозини яхшилаш, даволашнинг янги усулларини топиш ва тиббий тадқиқотларда янги билимларга эришишда СИнинг кучли аналитик қобилиятлари фойдали бўлиши мумкин.