Бир йил давомида суратга олинган, профессионал актёрлар ансамбли жамланган “Офицер 55” фильми тақдимотидан репортаж (фото, видео) 

Пойтахтдаги “Ёшлар ижод саройи”да ички ишлар ходимларининг фаолиятига  бағишланган “Офицер 55” фильмининг тақдимот маросими бўлиб ўтди. Тақдимотда лойиҳа ижодкорлари ва таниқли актёрлар иштирок этди.

Фильм Ички ишлар органларини хизмат фаолиятини кенг очиб бериб, оғир вазиятларда уларнинг ушбу вазиятдан қандай чиқиши, халқ тинчлиги ва осойишта ҳаёти учун жонини беришга тайёр экани, уларнинг профессионал тайёргарлиги ҳақида ҳикоя қилади.

Ушбу лойиҳа Ўзбекистон Кинематография агентлиги ва Ички ишлар вазирлиги ҳамкорлигида суратга олинган. Фильм 10 та қисмдан иборат ва унга режиссёр Рустам Мелиев бошчилик қилган. Лойиҳада бош ролларни Эркин Бозоров, Аброр Йўлдошев, Нигина Анорбоева ва Жамшид Асадов ижро этган ва фильм бир йилдан ортиқроқ вақт давомида суратга олинган.

“Ушбу сериалда мен жиноят қидирув ишлари бўлим бошлиғи, подполковник Ўринов ролини ижро этдим. Бу менинг кинодаги фаолиятимдаги биринчи йирик, жиддий рол. Бор маҳоратимни ишга солиб, консультантларни айтганини қилиб, ўқиб-ўрганиб, шу соҳа вакилларининг касбига оид жараёнларни ҳис қилиб тўлақонли рол ижро этишга ҳаракат қилдим. Қанчалик яхши чиққанига томошабин баҳо беради”, — дейди актёр Аброр Йўлдошев.

“Сериалнинг суратга олиш жараёнлари қиш пайтига тўғри келди. Унда тундан тонггача бўлган жараёнлар кўп бўлгани қийнади. Динамикани оширишга бой бўлган кадрлар актёрлардан озгина кўпроқ машаққатни талаб қилди.

Бу сериал ўзбек томошабинига ўзбек киноижодкорлари ҳам жаҳон стандартларидан қолишмайдиган лойиҳаларни ярата олади, ёш жамоалар устоз ижодкорларнинг ҳамкорлигида яхши асарлар яратишга қодир, деган гапни айта олса керак”, — дейди фильмда бош роллардан бирини ижро этган актёр Эркин Бозоров.

“Премьерани жуда узоқ кутдик. Жуда кўп суратга олиш жараёнлари, монтаж ишлари, овоз бериш жараёнлари, умуман олганда жуда кўп иш қилдик. Биз қилган ҳар бир лойиҳа ижодкорларга ўзининг фарзандидек муҳим. Сериалда бош ролни ижро этмаган бўлсам ҳам ролимга бор меҳримни бердим. Баҳони халқимиз беради. Ҳозир бунақа фильм халқимизга, ёшларимизга, катталарга керак деб ўйлайман”, — дейди актриса Феруза Юсупова.

Фильм тақдимоти давомида лойиҳа ижодкорлари саҳнага таклиф этилди ва лойиҳа ҳақида ўз фикрларини билдирди. Тақдимот давомида ташриф буюрган томошабинлар ва лойиҳа ижодкорларига “Офицер 55” фильмининг қисмлари намойиш этилди.

Батафсил репортажни қуйида томоша қилишингиз мумкин.