“Ўзэнергосотиш”га янги раис тайинланди

Жаҳонгир Обиджонов “Ўзэнергосотиш” бошқаруви раиси этиб тайинланди. Бу ҳақда Энергетика вазирлиги матбуот хизмати хабар берди.

Жаҳонгир Обиджонов 1976 йилда Тошкент шаҳрида туғилган. 1998 йил Тошкент Давлат иқтисодиёт университети ҳамда 2006 йил Ўзбекистон Президенти ҳузуридаги Давлат ва жамият қурилиши академиясини тугатган.

У 2004—2007 йиллар Марказий банкда турли лавозимларда, 2007—2017 йиллар “Ўзбекистон саноат-қурилиш банки” ОАТБ бошқаруви раисининг биринчи ўринбосари, 2017—2019 йиллар “Ўзбекэнерго” бошқарув раиси ўринбосари, кейинчалик бошқаруви раиси вазифасини бажарувчи, 2020—2022 йиллар “Ҳудудий электр тармоқлари” бошқаруви раисининг биринчи ўринбосари лавозимларида фаолият юритган.

Жаҳонгир Обиджонов 2024 йилда Англиянинг Аnglia Rusking University университетида “Бизнес бошқаруви магистри” (MBA) магистратура босқичини амомлаган.

Шунингдек, Шоҳрух Қорабаев “Ўзэнергосотиш” бошқаруви раисининг биринчи ўринбосари вазифасини бажарувчи этиб тайинланди.

Шоҳрух Қорабаев бунга қадар Энергетика вазирлиги ҳузуридаги Электр энергетикаси тармоғини ислоҳ қилиш бўйича лойиҳа офиси директори ўринбосари лавозимида фаолият юритиб келаётган эди.

• Эслатиб ўтамиз, 2023 йилда “Энергетика соҳасини ислоҳ қилишнинг навбатдаги босқичини амалга ошириш чора-тадбирлари тўғрисида”ги президент фармони қабул қилинганди.
• Фармон билан электр энергиясини марказлашган тартибда харид қилиш ва сотиш функциясини бажарувчи “Ўзэнергосотиш” ташкил этилган эди.