Veolia Energy Tashkent компанияси Чилонзор туманида хандаққа ағдарилиб тушган автокран бўйича маълумот берди.
Қайд этилишича, 11 июнь куни пудратчи ташкилот таъмирлаш ишлари олиб бораётган вақтда нохуш ҳодиса юз берган. Иш жойи тўғри ўралгани натижасида ҳеч ким жабрланмаган.
Пудрат ташкилоти Чилонзор туманида эскирган қувурларни алмаштиришни амалга ошираётган эди. Иш тугагандан сўнг, жараёнда иштирок этган автокран хандаққа ағдарилди, — дейилади хабарда.
Ҳозирда Veolia Energy Tashkent компанияси раҳбарияти ва мутахассислари пудратчи ташкилот вакиллари билан биргаликда ҳодиса юзасидан суриштирув ишларини олиб бормоқда. “Мақсад — ҳодисанинг аниқ сабабларини аниқлаш ва келажакда шунга ўхшаш вазиятларнинг олдини олишга қаратилган чора-тадбирлар комплексини ишлаб чиқиш”, — дея таъкидланади хабарда.
Эслатиб ўтамиз, 3 май куни Чилонзор тумани 5-мавзеда 55 ёшли энага бир ёшли қизчани аравачада олиб кетаётган вақтда унинг устига дарахт қулаб тушган. Бола воқеа жойида ҳалок бўлган. Мазкур ҳолат юзасидан Жиноят кодексининг 186-моддаси 3-қисми (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) бўйича жиноий иш очилган.
Изоҳ (0)