Veolia Energy Tashkent kompaniyasi Chilonzor tumanida xandaqqa ag‘darilib tushgan avtokran bo‘yicha ma’lumot berdi.
Qayd etilishicha, 11-iyun kuni pudratchi tashkilot taʼmirlash ishlari olib borayotgan vaqtda noxush hodisa yuz bergan. Ish joyi to‘g‘ri o‘ralgani natijasida hech kim jabrlanmagan.
Pudrat tashkiloti Chilonzor tumanida eskirgan quvurlarni almashtirishni amalga oshirayotgan edi. Ish tugagandan so‘ng, jarayonda ishtirok etgan avtokran xandaqqa ag‘darildi, — deyiladi xabarda.
Hozirda Veolia Energy Tashkent kompaniyasi rahbariyati va mutaxassislari pudratchi tashkilot vakillari bilan birgalikda hodisa yuzasidan surishtiruv ishlarini olib bormoqda. “Maqsad — hodisaning aniq sabablarini aniqlash va kelajakda shunga o‘xshash vaziyatlarning oldini olishga qaratilgan chora-tadbirlar kompleksini ishlab chiqish”, — deya ta’kidlanadi xabarda.
Eslatib o‘tamiz, 3-may kuni Chilonzor tumani 5-mavzeda 55 yoshli enaga bir yoshli qizchani aravachada olib ketayotgan vaqtda uning ustiga daraxt qulab tushgan. Bola voqea joyida halok bo‘lgan. Mazkur holat yuzasidan Jinoyat kodeksining 186-moddasi 3-qismi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bo‘yicha jinoiy ish ochilgan.
Izoh (0)