Бишимбаев қандай ҳолатда шартли равишда озод этилади?

Қозоғистон Адлия вазири ўринбосари Бўтағоз Жакселекова рафиқасининг ўлимида айбланиб, 24 йилга қамалган собиқ иқтисодиёт вазири Куандик Бишимбаевнинг шартли равишда озод этилиши эҳтимолига изоҳ берди.

Вазир ўринбосарининг тушунтиришича, қонунга асосан оғир жиноятлар содир этган шахслар қамоқдан шартли равишда озодликка чиқиш имкониятига эга. Бунинг учун маълум талабларга риоя қилиш керак. Агар жиноятчининг қамоқхонадаги хатти-ҳаракати ижобий характерланса, у жазони ўтаётган муассаса шартли равишда озод қилиш учун ариза беради.

Аммо маҳкум жазо муддатининг учдан икки қисмини ўтаб бўлгандан кейингина шартли равишда озод этилиши мумкин, шу билан бирга, оғир жиноятларда айбдор бўлганлар учун яна бир шарт бор.

“Албатта, бундай ҳолатда жабрланувчи томоннинг розилиги талаб қилинади. Аммо яна бир бор таъкидламоқчиманки, биринчи навбатда суд қарори устунлик қилади. Иккинчидан, ушбу ҳукм кучга киришини кутишимиз керак. Шу боис, ҳозирги босқичда ҳеч қандай изоҳ бера олмайман”, — деди Жакселекова. 

Салтанат Нукенованинг ўлими

2023 йилнинг 9 ноябрь куни Остонадаги ресторанлардан бирида Қозоғистон собиқ иқтисодиёт вазири Куандик Бишимбаевнинг турмуш ўртоғи Салтанат Нукенова тан жароҳатлари етказилгани оқибатида вафот этди. Ҳодисадан бир кун аввал кечқурун Бишимбаев “Бау” ресторанида рафиқаси билан жанжаллашиб қолган. Эркак илк бор Салтанат Нукеновани ҳожатхонада, кейин эса лифтдан чиқишда урган. Шундан сўнг, собиқ вазирнинг сўзларига кўра, турмуш ўртоғи рестораннинг VIP кабинасида диванга ётиб ухлаб қолган.

У 9 ноябрь куни кечқурун Нукенованинг юзи ва танаси совуқ эканини пайқагач, тез ёрдам чақирган. Шифокорлар аёлнинг бир кун аввал ўлганини аниқлаган.

12 ноябрь куни Бишимбаев икки ойга ҳибсга олинган. Январь ойи бошида Бишимбаев иши бўйича тергов якунланган. Собиқ вазир устидан суд жараёни 2024 йил 27 мартдан бошланган.

• Маълумот ўрнида, 2018 йил мартида Бишимбаев пора олгани учун 10 йилга озодликдан маҳрум этилганди, 2019 йил февралида у афв этилган ва 2019 йил октябрь ойида шартли равишда озод қилинган.
• Бишимбаев 2016 йилнинг май ойи бошидан декабрь ойи охиригача Миллий иқтисодиёт вазирлигини бошқарган.