Ижтимоий тармоқларда Андижонда ўтказилиши режалаштирилаётган “Дунё садолари” халқаро эстрада санъати фестивалига жаҳон юлдузлари ташриф буюриши ҳақидаги хабарлар муҳокамаларга сабаб бўлган эди. Мазкур хабарлар юзасидан Андижон вилояти ҳокимлиги матбуот хизмати муносабат билдирди.
Маълум қилинишича, фестивалга ҳокимлик матбуот хизмати томонидан тарқатилган видеолавҳада кўрсатилган хонандалардан Инна ва Араш таклиф этилган. Шунингдек, ёшлар таклифига асосан хонанда Jony ҳам фестивалда иштирок этади.
Бундан ташқари, ўзбек эстрадасининг юлдузлари фестивалга ташриф буюриши кутилмоқда.
Ушбу айтилганлардан ташқари, ижтимоий тармоқларда жойланган хонандалар ҳақидаги матнли рўйхат, келишув маблағлари, марҳум санъаткорлар ҳақидаги хабарлар ҳокимлик томонидан тасдиқланган ёки ҳокимлик тақдим этган маълумотлар эмас. Бу хабарлар ким томонидан ишлаб чиқилгани ва қандай мақсадда ҳавола этилгани ҳозирча номаълум, – дейилади хабарда.
Қўшимча қилинишича, фестивал арафасида тадбир бўйича матбуот анжумани ташкил этилади.
Изоҳ (0)