Андижон вилоятининг Хонобод шаҳрида 2023 йилнинг июнь ойида “Дунё садолари” халқаро миллий эстрада фестивали ўтказилади. Унда дунёнинг 86 мамлакатидан миллий эстрада хонандалари иштирок этади. Бу ҳақда “Дарё” мухбири Умиджон Мамарасулов хабар бермоқда.
Маълум қилинишича, президент Шавкат Мирзиёевнинг 2019 йил 17 май куни Андижон вилоятига ташрифи мобайнида туризмни ривожлантиришга доир лойиҳалар тақдимоти қилиниб, ички ва ташқи туризмни ривожлантириш мақсадида Хонобод шаҳрида миллий эстрада ижрочилиги бўйича халқаро фестиваль ўтказиш таклифи илгари сурилган. Шунингдек, 2022 йил 3 февралдаги “Маданият ва санъат соҳасини янада ривожлантиришга доир қўшимча чора-тадбирлар тўғрисида”ги президент қарорида 2023 йилда “Дунё садолари” халқаро миллий эстрада санъати фестивалини ўтказиш белгиланган.
Хонобод шаҳар ҳокими Машъалбек Тожибоевнинг айтишича, фестивалга тайёргарлик кўриш ишлари бошланган. Маданият ва туризм вазирлигидан вакиллар келиб, саҳналар ўрнатиладиган жойларни танлаб кетган. Ҳозирда саҳналарни барпо этиш, шу билан бирга меҳмонлар жойлаштириладиган биноларда шарт-шароитларни яратиш юзасидан тегишли чора-тадбирлар ишлаб чиқилмоқда. Шунингдек, томошабинларнинг мириқиб ҳордиқ чиқаришлари учун ҳам барча қулайликлар яратилиши белгиланган.
Таъкидланишича, мазкур фестиваль республика ва маҳаллий бюджет маблағлари ҳисобига ўтказилиши кўзда тутилган. Фестивальга дунёнинг 86 мамлакатидан миллий эстрада хонандаларини таклиф этиш режалаштирилган.
Изоҳ (0)