Наманган вилояти мактабгача ва мактаб таълими бошқармаси ўқитувчилар номига кредит олган директор ўринбосари юзасидан маълумот берди.
Ижтимоий тармоқларда Наманган туманидаги 27-сонли мактабнинг ўқув ишлари бўйича директор ўринбосари З.Аҳмедованинг фаолияти ўрганиб чиқилиши кераклиги, сабаби мактабда иш фаолияти давомида қўл остида ишлаётган ўқитувчи ва ходимларнинг номига кредит олиб, ўз вақтида кредитни бартараф этмасдан, педагог ҳамда ходимлар ўз ҳисобидан кредит тўловини тўлаб келишаётгани айтилган хабарлар тарқалди.
Туман мактабгача ва мактаб таълими бўлими ишчи гуруҳи томонидан олиб борилган ўрганишда юқоридаги ҳолат ўз тасдиғини топган. Вазифасига нисбатан совуққонлик билан ёндашган муассаса директорининг ўринбосари лавозимидан озод қилинган.
Аввалроқ Сирдарёдаги мактабда ўқувчилар клип томоша қилгани ортидан синф раҳбаридан директоргача ишдан олингани, Тошкентда ток уриши оқибатида вафот этган ўқувчи ўқиган мактаб директори ва унинг ўринбосари қамалгани тўғрисида хабар берилганди.
Изоҳ (0)