Шавкат Мирзиёев раислигида Бухоро вилоятини ижтимоий-иқтисодий ривожлантириш масалалари юзасидан ўтказилаётган видеоселектор йиғилишида Кооперация портали орқали маҳсулот етказиб бериш масаласига ҳам тўхталиб ўтди.
Давлат раҳбарига кўра, Бухородаги 205 минг гектар ерни суғориш учун 50 та насос станция йилига 1,5 миллион киловатт/соат электр сарфламоқда. Улар энерготежамкор, замонавий насосларга алмаштирилса, йилига камида 400 миллиард сўм иқтисод бўлади.
Вилоятдаги 89 та саноат корхонаси давлат ташкилотларига Кооперация портали орқали маҳсулот етказиб бераётгани — бу жуда камлиги кўрсатиб ўтилди.
Масалан, порталда Вобкентдан бирорта корхона қатнашмаган, Олот ва Пешкудан — 1 тадан, Жондор ва Бухоро туманидан — 2 тадан корхона иштирок этган.
Шу муносабат билан мутасаддиларга Кооперация порталида ҳақиқий ишлаб чиқарувчилар қатнашадиган тартиб қилиш, ишлаб чиқарувчиларнинг давлат харидидаги иштирокини кенгайтириш бўйича қарор лойиҳасини киритиш топширилди.
Бундан олдин президент вилоят салоҳиятини тўлиқ ишга солиш бўйича вилоят раҳбарияти, 13 та туман ва шаҳар ҳокимларининг ҳозирги фаолияти жуда сустлигини кўрсатиб ўтганди.
Изоҳ (0)