Нигериянинг Нигер штати марказидаги қишлоққа жангарилар томонидан уюштирилган ҳужумда камида 10 киши ҳалок бўлди, яна 160 киши ўғирлаб кетилди. Бу ҳақда маҳаллий аҳолига таяниб, BBC хабар берди.
“Боко Ҳарам” исломий гуруҳидан экани тахмин қилинган қуролли жангарилар 24 май куни кечқурун Кучи қишлоғига кириб келган, — дейди маҳаллий кенгаш раиси Амину Абдулҳамид Нажуме.
Унинг сўзларига кўра, ўғирланганлар орасида асосан аёллар ва болалар, ҳалок бўлганлар орасида ҳудуд хавфсизлигини таъминлаган маҳаллий аҳоли бўлган.
Маълумотларга кўра, жангарилар қишлоққа мототциклларда кирган ва уйларни талон-тарож қилиб, маҳаллий аҳолини олиб кетган.
Халқаро Амнистия инсон ҳуқуқлари ташкилоти оммавий ўғирлашдан чуқур хавотирда эканини айтган.
Жангариларнинг қишлоққа бостириб кириши Нигерия ҳукумати одамларнинг ҳаётини ҳимоя қила олмаганининг яна бир далилидир. 2021 йилдан бери жангарилар Кучи қишлоғига доимий ҳужум қилиб, аёллар ва қизларни зўрламоқда, — дейилади хабарда.
Ташкилотга кўра, жангарилар кўпинча аҳолидан катта миқдорда тўлов талаб қилади.
Изоҳ (0)