“Европа Иттифоқининг ядро қуроли бўлмайди” — Шольц

Германия канцлери Олаф Шольц Европа Иттифоқининг ўз ядро қуролига эга бўлиш эҳтимолини рад этди.

Аниқ бўлиши учун: “Европа Иттифоқининг ядро қуроли” бўлмайди, бу шунчаки имконсиз, — дейди Шольц.

У Франция президентининг НАТО устунини мустаҳкамлаш йўлидаги Европанинг келажакдаги мудофаасини муҳокама қилиш таклифини қўллаб-қувватлаган. Шу билан бирга, у ЕИ Франция ядровий тўхтатувчиси суверенитетига тажовуз қилмаслигини таъкидлаган.

Биз Европани ҳимоя қилиш ва ҳар қандай тажовузкорни – бугун ва келажакда тўхтатишни муҳокама қилишимиз керак, — дея қўшимча қилган Германия канцлери.

Шольц шунингдек, Германиянинг хавфсизлик ва мудофаа сиёсатидаги мисли кўрилмаган, тектоник силжишларга ишора қилган. У немис армиясини қайта қуриш ва модернизация қилиш учун 100 миллиард евро жамғариш учун конституцияга ўзгартириш киритилганини айтган.

Бизнинг мақсадимиз Бундесверни Европадаги энг кучли оддий қуролли кучларга айлантиришдир. Жорий йилдан ва келажакда ялпи ички маҳсулотнинг 2 фоизини мудофаага сарфлаймиз, —  дейди Шольц.

Шу билан бирга, Германия канцлери НАТО Россия билан қарама-қаршиликка интилмаслигини ва альянсни Украинадаги можаронинг бир томонига айлантирадиган ҳеч қандай қадам ташламаслигини яна бир бор таъкидлаган.