Германия ТИВ раҳбари Анналена Бербок Украина президенти Владимир Зеленский беш йиллик ваколат муддати тугаганидан кейин ҳам қонуний давлат раҳбари ҳисобланишини айтди, дея Deutsche Welle хабар берди.
Айнан Россия “хиёнаткор ўйин” ўйнаяпти ва Зеленскийнинг қонунийлигини шубҳа остига қўймоқда, чунки Украина уруш шароитида овоз бера олмайди, — деб таъкидлаган Бербок.
У шунингдек, Зеленский билан мавжуд муаммоларни муваффақиятли ҳал этишда давом этишини маълум қилган.
Украинани ҳимоя қилишда ҳамда барча ислоҳот жараёнларида бирга қатнашамиз, — дея Бербок Украина раҳбариятини ишонтирган.
Германиялик вазирнинг фикрича, воқеаларнинг бундай ривожланишига “халқаро ҳуқуқни бузувчи шафқатсиз уруши билан тўсқинлик қилган” ягона шахс бу Путин.
Маълумот учун, Владимир Зеленский 2019 йил 20 май куни Украина президенти лавозимига киришган. 5 йил муддатга сайланган давлат раҳбарининг навбатдаги сайлови жорий йилнинг 31 март куни ўтказилиши керак эди. Бироқ Олий Рада мамлакатдаги ҳарбий ҳолат сабабли сайловни эълон қилмаган. Украина раҳбари 2023 йилнинг ноябрида ҳозир сайлов вақти эмаслигини айтган.
Украина конституциясининг 108-моддасига кўра, мамлакат президенти ўз ваколатларини янги сайланган давлат раҳбари лавозимига киришгунга қадар амалга оширади. Шунга ўхшаш қоидалар бошқа мамлакатларнинг энг юқори меъёрий-ҳуқуқий ҳужжатларида мавжуд, — дея Бербок қўшимча қилган.
Россия Зеленскийнинг раҳбарлик фаолияти қонунийлигига бир неча бор шубҳа билдирган. Россия ТИВ раҳбари Сергей Лавров Зеленский энди Украинанинг қонуний президенти эмаслигини таъкидлаган.
Изоҳ (0)