Ўзбекистонга туркманистонлик ҳайдовчиларнинг кириши бир ойдан ортиқ вақтдан буён тўсиб қўйилган. Ҳайдовчилар чегарани кесиб ўтишда зарур бўлган визани ололмаяпти. LogiStan таҳририяти чегарадаги мавжуд вазиятга ойдинлик киритди.
Маълум қилинишича, апрель ойининг ўрталарида туркманистонлик ҳайдовчиларга виза бермаслик ҳақидаги шикоятлар пайдо бўла бошлаган. Ўшанда чекловлар Туркманистоннинг Ўзбекистон билан чегарасидаги “Фарап” автомобиль ўтказиш пункти ҳудудида юзлаб юк машиналарининг турнақатор навбатларини келтириб чиқарган.
Таъкидланишича, муаммони ҳал қилиш муддати номаълум. Ашхобод ва Тошкент музокаралар олиб бормоқда, аммо айни дамда дипломатлар келишувга эриша олмаяпти. Мазкур ҳолат фақат Туркманистон фуқаролигига эга ҳайдовчилар билан юзага келмоқда. Бошқа мамлакатларнинг ташувчилари одатдагидек визалар олмоқда.
“Туркманистон ҳайдочиларининг киришини тўсиб қўйиш орқали Ўзбекистон расмийлари туркман ва ўзбек ташувчилари учун ҳужжатларни расмийлаштиришда шартлар номутаносиблигидан норозилигини намойиш этмоқда”, — деб ёзмоқда LogiStan ва бунга мисол келтирмоқда:
- Туркманистондаги ўзбек ҳайдовчиларидан ўртача 700-900 доллар, Ўзбекистондаги туркман ҳайдовчиларидан эса 200 доллар ундирилади.
- Туркман суғуртасини расмийлаштириш — 100 доллар, Ўзбекистон суғуртаси эса 15 доллар.
- Туркманистонда янги CМР бланкасини тўлдириш 200 доллар, маршрут харитаси — 200 доллар, GPS қурилмаси — 20 доллар ва ҳоказо. Ўзбекистонда бундай тўловлар олинмайди.
Туркманистонда ўзбекистонлик ҳайдовчилар учун процедураларни соддалаштириш масаласи 2024 йил апрель ойи ўрталарида бўлиб ўтадиган музокаралар натижасида ҳал этилиши режалаштирилганди. Мавзу кўп йиллар давомида муҳокама қилинган.
Ҳужжатлар тайёр эди, имзо қўйишгина қолганди. Бироқ Туркманистон делегацияси буни рад этди, — таъкидлайди LogiStan.
Изоҳ (0)