Туркманистонда қуруқлик ва денгиз чегараларини ишончли ҳимоя қилиш, чегара бўлинмаларининг моддий-техник базасини мустаҳкамлаш бўйича комплекс чора-тадбирлар амалга оширилди, деб хабар бермоқда “Олтин Асир” маҳаллий телеканали. Бу ҳақда Давлат чегара хизмати раҳбари Язгелди Нурев Давлат хавфсизлик кенгаши йиғилишида маълум қилган.
Туркманистон президенти, Қуролли кучлар олий бош қўмондони Сердар Бердимуҳамедов ватаннинг муқаддас чегараларини дўстлик ва қардошлик чегаралари деб эълон қилган Туркманистон барча давлатлар, биринчи навбатда, қўшни давлатлар билан конструктив мулоқот ва самарали ҳамкорликни йўлга қўйганини таъкидлади.
Давлат раҳбари, шунингдек, Туркманистоннинг ҳарбий доктринаси соф мудофаа характерига эга эканлигини айтди. 1995 йилдан бери Туркманистон ижобий бетарафлик мақомига эга ва ҳеч қандай ҳарбий-сиёсий блокга кирмайди.
Туркманистон қуруқликда Афғонистон (800 км), Эрон (1148 км), Қозоғистон (458 км) ва Ўзбекистон (1650 км) билан чегарадош. Каспий денгизда мамлакат Озарбайжон, Эрон, Қозоғистон ва Россия билан чегарадош. Туркманистон денгиз чегарасининг умумий узунлиги 600 км га яқин.
Ашхобод мунтазам равишда ҳарбий-тактик машғулотлар ўтказиб туради. Global Firepower таҳлилий марказининг ҳисобот беришича, Туркманистон армияси Марказий Осиёнинг бешта давлати ичида Қозоғистон ва Ўзбекистондан кейин учинчи энг қудратли армия ҳисобланади.
Эзиз Бояров
Изоҳ (0)