O‘zbekistonga turkmanistonlik haydovchilarning kirishi bir oydan ortiq vaqtdan buyon to‘sib qo‘yilgan. Haydovchilar chegarani kesib o‘tishda zarur bo‘lgan vizani ololmayapti. LogiStan tahririyati chegaradagi mavjud vaziyatga oydinlik kiritdi.
Ma’lum qilinishicha, aprel oyining o‘rtalarida turkmanistonlik haydovchilarga viza bermaslik haqidagi shikoyatlar paydo bo‘la boshlagan. O‘shanda cheklovlar Turkmanistonning O‘zbekiston bilan chegarasidagi “Farap” avtomobil o‘tkazish punkti hududida yuzlab yuk mashinalarining turnaqator navbatlarini keltirib chiqargan.
Ta’kidlanishicha, muammoni hal qilish muddati noma’lum. Ashxobod va Toshkent muzokaralar olib bormoqda, ammo ayni damda diplomatlar kelishuvga erisha olmayapti. Mazkur holat faqat Turkmaniston fuqaroligiga ega haydovchilar bilan yuzaga kelmoqda. Boshqa mamlakatlarning tashuvchilari odatdagidek vizalar olmoqda.
“Turkmaniston haydochilarining kirishini to‘sib qo‘yish orqali O‘zbekiston rasmiylari turkman va o‘zbek tashuvchilari uchun hujjatlarni rasmiylashtirishda shartlar nomutanosibligidan noroziligini namoyish etmoqda”, — deb yozmoqda LogiStan va bunga misol keltirmoqda:
- Turkmanistondagi o‘zbek haydovchilaridan o‘rtacha 700-900 dollar, O‘zbekistondagi turkman haydovchilaridan esa 200 dollar undiriladi.
- Turkman sug‘urtasini rasmiylashtirish — 100 dollar, O‘zbekiston sug‘urtasi esa 15 dollar.
- Turkmanistonda yangi CMR blankasini to‘ldirish 200 dollar, marshrut xaritasi — 200 dollar, GPS qurilmasi — 20 dollar va hokazo. O‘zbekistonda bunday to‘lovlar olinmaydi.
Turkmanistonda o‘zbekistonlik haydovchilar uchun protseduralarni soddalashtirish masalasi 2024-yil aprel oyi o‘rtalarida bo‘lib o‘tadigan muzokaralar natijasida hal etilishi rejalashtirilgandi. Mavzu ko‘p yillar davomida muhokama qilingan.
Hujjatlar tayyor edi, imzo qo‘yishgina qolgandi. Biroq Turkmaniston delegatsiyasi buni rad etdi, — ta’kidlaydi LogiStan.
Izoh (0)