Россия тактик ядро қуроллари билан ҳарбий машғулотлар бошлади (видео)

Россия Мудофаа вазирлиги стратегик бўлмаган ядро қуроллари иштирокида ҳарбий машғулотлар бошлади. Бу ҳақда вазирлик сайтида хабар берилди.

Машғулотлар Украина билан чегарага яқин Жанубий ҳарбий округда бўлиб ўтмоқда. Манёврларнинг биринчи босқичи стратегик бўлмаган ядро қуролларини тайёрлаш ва қўллаш бўйича амалий машғулотларни ўз ичига олади. Унда “Искандер” ва “Кинжал” ракета тизимларининг жанговар қўлланилиши синовдан ўтказилади. 

Стратегик қуроллардан фарқли ўлароқ, тактик ядро қуролларининг кучи бир неча килотон тротил эквивалентидан (портлаш пайтида чиқарилган энергиянинг умумий қабул қилинган анъанавий ўлчов бирлиги) ошмайди. Путин кўрсатмаларига мувофиқ машғулотларга Россия Қуролли кучлари бош штаби раҳбарлик қилмоқда.

Машқлар давомида шахсий таркиб ва ​​техниканинг жавоб чоралари учун стратегик бўлмаган ядро қуролидан фойдаланишга тайёрлиги синовдан ўтказилади, — дейилади Мудофаа вазирлиги хабарида.

Вазирликнинг таъкидлашича, машғулотлар Ғарбнинг айрим расмийларининг Россияга қарши “провокацион баёнотлари ва таҳдидларига жавобан” Россия давлатининг ҳудудий яхлитлиги ва суверенитетини таъминлаш мақсадида амалга оширилмоқда.

Машғулотларда Беларусь ҳам иштирок этади

9 май куни Путин Россия ва Беларусь ҳарбийлари стратегик бўлмаган ядро қуролларини синовдан ўтказиш бўйича машғулотларга биргаликда тайёргарлик кўришни бошлаганини айтди.

Беларусь ҳудудида стратегик бўлмаган ядро қуроллари жойлашгани сабабли, бу сафар иттифоқчиларимизни таклиф қилдик ва Беларусь президенти ушбу машғулот босқичларидан бирида иштирок этишни сўради, — деди Россия президенти.

Шу билан бирга, у бундай машғулотлар 2024 йилда 3 босқичда мунтазам ўтказилаётганини таъкидлади.

Иккинчи босқичда беларуслик ҳамкасблар ҳаракатларимизга қўшилади, — дея қайд этди Россия президенти.