Германия ташқи ишлар вазири Анналена Бербок Хитой раиси Си Цзиньпинни “диктатор” деб атади. Хитой Ташқи ишлар вазирлиги немис вазирининг сўзларига муносабат билдирди. Бу ҳақда Reuters хабар берди.
Хитой ТИВ матбуот котиби Мао Нин бу сўзларни “мутлақ бемаънилик”, “очиқ сиёсий провокация” ва “Хитойнинг сиёсий обрўсига жиддий зарар етказувчи” деб атади. Пекин дипломатик каналлар орқали Берлинга норозилик билдирди. Хитой Ташқи ишлар вазирлиги ҳолат юзасидан Германия элчисини чақиртирди.
“Агар Путин бу урушда ғалаба қозонса, бу қандай белги бўлар эди? Хитой раиси Си каби дунёнинг бошқа диктаторлари учун бу нимани англатарди?” — деган эди Анналена Бербок Fox News телеканалига берган интервьюсида.
Бунгача Бербок Хитой “дунёда бирга яшаш асосларига” қарши чиқаётганини айтган. Шунингдек, Пекин тобора “савдо ҳамкори эмас, балки тизимли рақибга” айланиб бораётганини билдирган.
Бир неча ҳафта олдин АҚШ президенти Жо Байден ҳам Си Цзиньпинни диктатор деб атаган эди. Хитой Ташқи ишлар вазирлиги унинг сўзларига худди Бербокнинг баёнотидай жавоб берган.