Қашқадарё вилоятида 2023 йилда оналар ўлими билан боғлиқ 19 та ҳолат юз берган. Бу ҳақда Сенатнинг 52-ялпи мажлисида Сенат раиси Танзила Норбоева маълум қилди.
Мажлис ишида Танзила Норбоева Қашқадарё вилоятида ўтказилган ижтимоий-иқтисодий ўрганишлар юзасидан ахборот берди. Унда вилоятда соғлиқни сақлаш, жумладан, репродуктив саломатликни сақлаш, оналик ва болаликни муҳофаза қилиш каби йўналишларда ҳам амалга оширилиши лозим бўлган ишлар жуда кўплиги таъкидланди.
Ўтган йилда оналар ўлими билан боғлиқ 19 та ҳолат қайд этилган ва бу республика бўйича энг юқори кўрсаткичлардан бирини ташкил қилади.
Айни пайтда биз ушбу йўналишда, яъни хотин-қизлар, болалар саломатлиги масаласида, бир сўз билан айтганда, репродуктив саломатлик масалалари бўйича республика бўйича комплекс ўрганишларни, таҳлилларни олиб боряпмиз. Бу йўналишда Қорақалпоғистон Республикаси, Самарқанд, Сирдарё ва Қашқадарё вилоятларида ўрганилди. Тегишли қонун лойиҳаси ҳозир тайёрланди, — деди Сенат раиси.
Февраль ойида президент Шавкат Мирзиёев оналар ва болалар ўлими юзасидан Соғлиқни сақлаш вазирлиги, ҳокимлар, тиббиёт идоралари раҳбарларини огоҳлантирган эди.
Изоҳ (0)