Қашқадарё вилояти перинатал марказида чақалоқ вафот этгани тўғрисида мурожаат эълон қилинди. Вилоят Соғлиқни сақлаш бошқармаси мурожаат юзасидан муносабат билдирди.
Маълум бўлишича, фуқаро вилоят перинатал марказида турмуш ўртоғининг кўзи ёригани, аммо шифокорлар фарзандига яхши қарамаётгани, тамагирлик қилишаётгани, келганидан буён бу ерда 21 нафар бола вафот этганини маълум қилган.
Дастлабки маълумотларга кўра, мурожаат муаллифининг турмуш ўртоғи 1997 йилда туғилган Х.Д. 2023 йил 13 мартдан 17 мартгача Тошкент тиббиёт академиясининг туғуруқ комплексида ҳомиладор аёллар патологияси бўлимида даволанган.
Аёл 2023 йил 16 мартда Республика она ва бола скрининг марказида скрининг ултратовуш текширувидан ўтказилган. Охирги ойларида Х.Д.да доимий оғриқ бўлган, у Чироқчи тумани тиббиёт бирлашмасининг туғуруққа тайёрлаш бўлимида даволанишга ётқизилган.
Чақалоққа ССВ томонидан тасдиқланган стандарт протоколлар асосида ёрдам кўрсатилган. Аммо шунга қарамасдан 28 март куни соат 13:15 да гўдакда ўткир юрак ва нафас етишмовчилигидан биологик ўлим қайд этилган. Ўлим сабаби: “Neonатал сепсис. DVС синдроми. Нафас ва юрак етишмовчилигининг оғир даражаси. Морфофункционал етуксизлик. Муддатидан олдин туғилган чақалоқ”.
Вилоят Соғлиқни сақлаш бошқармаси мурожаат муаллифига ҳамдардлик изҳор қилган. Бошқарма ишчи гуруҳи томонидан мурожаат муаллифи ва вилоят перинатал маркази навбатчи тиббиёт ходимлари иштирокида мазкур ҳолат муҳокама қилинди. Мурожаат муаллифи даъво қилган тамагирлик билан боғлиқ ҳолатлар ҳуқуқ-тартибот идоралари билан ҳамкорликда ўрганилиб, қонуний баҳо берилиши маълум қилинган.
Аниқланишича, мурожаат муаллифи ўз чиқишида келтириб ўтган вилоят перинатал марказига келганидан буён бу ерда 21 нафар гўдак вафот этгани ҳақидаги хабар ҳеч қандай асосга эга эмас. Бошқарма ижтимоий тармоқ орқали тарқатилган бу каби ёлғон маълумотлар аҳоли, шу жумладан, перинатал марказда даволанаётган бемор аёллар ва уларнинг яқинлари орасида нотўғри тасаввур ва тушунчалар ҳамда саросимага олиб келишини қайд этиб, шу боис ҳар қандай вазиятда бу каби ноқонуний ҳаракатлардан тийилишни сўраган.
Изоҳ (0)