Андижон вилоятида МИБ ходимини темир билан уриб, тан жароҳати етказган фуқарога суд ҳукми ўқилди. Бу ҳақда бюро ахборот хизмати “Дарё”га хабар берди.
Маълум қилинишича, фуқаролик ишлари бўйича Андижон туманлараро судининг 2021 йилдаги ижро ҳужжатига асосан даъвогар И.И.га тегишли бўлган, Хортум қишлоғида жойлашган ер майдонидаги жавобгар Б.А. ва унинг оила аъзолари томонидан ўзбошимчалик билан қурилган қурилмаларни жавобгарлар ҳисобидан буздириш белгиланган.
Ижро ҳужжатининг ижросини таъминлаш мақсадида жами 7 маротаба тайинланган мажбурий ижро ҳаракатларида қарздор тарафларнинг иштироки таъминланмагани сабабли ижро ҳаракатларини амалга ошириш имкони бўлмаган.
Шунга кўра, 13 март куни Мажбурий ижро бюроси Андижон туман бўлими давлат ижрочилари ҳамда ваколатли идоралар вакиллари иштирокида мажбурий ижро ҳаракатлари олиб борилган.
Ўзбошимчалик билан қурилган ноқонуний қурилмаларни махсус техника ёрдамида бузиш жараёнида қарздор Б.А. мажбурий ижро ҳаракатлари ўтказилишига тўсқинлик қилиб, темир жисм билан давлат ижрочисини уриб, тан жароҳати етказган.
Мазкур ҳолат юзасидан Жиноят ишлари бўйича Андижон туман суди ишни кўриб чиқиб, Маъмурий жавобгарлик тўғрисидаги кодекснинг 198-2-моддасига биноан қарздор Б.А.га нисбатан 15 сутка маъмурий қамоқ жазоси тайинлади.
Изоҳ (0)