Давлат хавфсизлик хизмати ходимлари Сирдарё ва Наманганда солиқ ҳамда мажбурий ижро бюроси ходимларини, Жиззахда эса адвокатни пора билан қўлга олди.
Қайд этилишича, Сирдарё вилояти Солиқ бошқармасининг солиқ тўловчиларга хизмат кўрсатиш бўлими бош инспектори Гулистон шаҳрида фаолият юритувчи учта МЧЖнинг солиқ қарзларини, ушбу МЧЖларни соддалаштирилган тартибда банкрот деб топиш йўли билан бартараф қилиб бериш эвазига 4 минг доллар олган вақтида ашёвий далиллар билан ушланган.
Наманган вилояти Янгиқўрғон тумани солиқ инспекцияси катта инспектори боғдорчиликка ихтисослашган фермер хўжаликнинг 2023 ва 2024 йиллар учун ер солиғидан аниқланган 11 миллион 200 минг сўм миқдоридаги қарздорлигини бартараф қилиб бериш эвазига 7 миллион сўм, шунингдек, ушбу фермер хўжалик раҳбарининг танишига тегишли нотурар жойнинг мол-мулк ва ер солиқларидан бўлган 55 миллион 100 минг сўм қарздорлигини ҳам тўлиқ бартараф қилиб бериш эвазига 28 миллион сўм талаб қилади. У талаб қилинган жами 35 миллион сўм пул маблағини олган вақтида ушланган.
Наманган вилояти Учқўрғон туманидаги мева-сабзавот сақлаш фаолияти билан шуғулланувчи масъулияти чекланган жамиятга совутиш омбори қуриш ва унга зарур бўладиган агрегатлар сотиб олиш учун 2023 йилнинг январь ойида акциядорлик тижорат банкидан 170 минг доллари миқдорида кредит ажратилган Аммо олинган кредитни тўлаш даврида 3 ойлик қарздорлик юзага келиб, уни ундириш мақсадида банк томонидан Мажбурий ижро бюросининг Учқўрғон туман бўлимига мурожаат қилинган.
Шундан сўнг, МЧЖ томонидан кредит қарздорлиги тўланса-да, бюронинг икки нафар давлат ижрочиси МЧЖ раҳбарини алдаб, гўёки туман прокуратураси томонидан кредит маблағи мақсадсиз сарфлангани бўйича жиноят иши қўзғатилганини айтиб, уни жавобгарликка тортилмаслик эвазига 2 минг доллар талаб қилган. МИБ Учқўрғон туман бўлимининг давлат ижрочилари сўралган пул маблағини олган вақтида ушланган.
Жиззах шаҳридаги адвокатлар ҳайъати адвокати Жиноят кодексининг 165- ва бошқа моддалари билан айбланиб, “қамоққа олиш” тарзидаги эҳтиёт чораси қўлланилган ўз ҳимоясидаги судланувчига нисбатан, суд органларидаги мансабдор танишлари орқали озодликдан маҳрум қилиш билан боғлиқ бўлмаган жазо тайинлатиб бериш эвазига 10 минг доллар олган вақтида қўлга тушган.
Ҳозирда мазкур шахсларинг барчасига нисбатан жиноят ишлари қўзғатилиб, қамоққа олиш тарзидаги эҳтиёт чораси қўлланилган.
Бундан олдин Нукусда 65 минг доллар эвазига ДХХга ишга киритиб қўйишни ваъда қилган шахс ушлангани, Қашқадарёда прокуратура терговчиси 5 минг доллар пора билан қўлга тушгани тўғрисида хабар берилганди.
Изоҳ (0)