Хоразмда ота алиментдан қарзи бўлмаса ҳам болаларига уй совға қилди 

Урганчлик ота фарзандларига алимент ўрнига уй совға қилди, деб хабар бермоқда МИБ ахборот хизмати “Дарё”га. 

Унга кўра, фуқаролик ишлари бўйича Урганч туманлараро судининг суд буйруғига асосан қарздор Х.А.дан ундирувчи З.Т. фойдасига икки нафар вояга етмаган фарзандларининг моддий таъминоти учун алимент ундириш белгиланган.

Бюронинг Урганч шаҳар бўлими томонидан мазкур ижро ҳужжати бўйича қарздор Х.А.дан алимент тўловлари ўз вақтида ундириб келинган. Ижро ҳужжати бўйича қарздор Х.А.нинг алимент тўловларидан қарзи мавжуд бўлмаса-да, ундирувчи З.Т. билан келишган ҳолда икки нафар фарзандининг келажаги учун улар вояга етгунга қадар тўланадиган алимент пуллари ўрнига фарзандларига кўп қаватли уйлардан хонадон олиб беришни маълум қилди.

Шу тариқа, собиқ турмуш ўртоқлар ўзаро келишувга эришиб, ота ўғлининг номига Урганч шаҳар марказидан бир хонали хонадон ҳужжатларини расмийлаштириб берди.