Хоразм вилоятида алимент қарздорлиги сабаб 4 йилдан ортиқ вақт мобайнида қидирувда бўлган шахс ушланди, деб хабар беради ЎзА.
Қайд этилишича, Мажбурий ижро бюроси Тахиатош туман бўлими иш юритувида бўлган иш юзасидан Фуқаролик ишлари бўйича Урганч туманлараро суди буйруғига асосан қарздор К.А.дан бир нафар фарзанди таъминоти учун собиқ турмуш ўртоғи фойдасига алимент ундириш белгиланган.
Қарздор алимент пулларини тўлашдан қочиб юргани сабабли унга нисбатан Мажбурий ижро бюроси Тахиатош туман бўлими давлат ижрочиси томонидан 2020 йил 12 март куни қидирув эълон қилинган. Унинг алимент тўловларидан қарздорлиги 2024 йил 1 май ҳолатига кўра, 101 миллион сўмни ташкил этган.
Бюронинг Қорақалпоғистон Республикаси бошқармаси қидирув шўбаси ходимлари томонидан олиб борилган тезкор-қидирувда қарздор К.А. Урганч туманида иккинчи оиласининг уйида истиқомат қилаётгани аниқланган. Бюронинг Хоразм вилояти бошқармаси қидирув шўбаси ходимлари билан биргаликда амалга оширилган тезкор-қидирув тадбирларида 4 йилдан ортиқ вақт мобайнида қидирувда бўлган қарздор К.А. Урганч туманида жойлашган товуқ фермасида ишлаётган вақтида топилган.
Ҳозир қарздорга нисбатан маъмурий баённома расмийлаштирилиб, тўпланган ҳужжатлар Жиноят ишлари бўйича Тахиатош туман судига юборилган ва ушбу суд томонидан 6 май куни қарздор К.А.га нисбатан 15 сутка маъмурий қамоқ жазоси қўлланилган.
Бундан олдин Наманган вилояти Чортоқ туманида алимент тўлашдан қочиб юрган эркак уй ертўласидан топилганди. Шунингдек, Фарғонада алимент тўламай юрган эркак бошқа хотинининг уйидан маст ҳолда топилгани тўғрисида хабар берилганди.
Изоҳ (0)