Фарғона вилояти Ўзбекистон туманида фарзандининг мактабга қатнашига тўсқинлик қилган отага чора кўрилди. Бу ҳақда вилоят Миллий гвардия бошқармаси хабар берди.
Қайд этилишича, Ўзбекистон тумани ХТБга қарашли 45-мактабга фарзандини таълимга қайтариш ва профилактик тушунтириш ишлари олиб бориш мақсадида 43 ёшли фуқаро М.А. инспектор-психолог томонидан чақирилган. Суҳбат давомида у ўзини носамимий тутиб, жамиятда юриш-туриш қоидаларига зид хатти-ҳаракатлар содир этиб, фарзандининг таълимга қайтмаслигини, ҳеч ким ҳеч нарса қила олмаслигини таъкидлаб, Миллий гвардия ҳарбий хизматчисининг қонуний талабларини бажармаган.
Мазкур ҳолат юзасидан фуқарога нисбатан Маъмурий жавобгарлик тўғрисидаги кодекснинг 183- (майда безорлик), 194-моддалари (ички ишлар органлари ходимининг қонуний талабларини бажармаслик) тартибида маъмурий баённома расмийлаштирилган.
Тўпланган иш ҳужжатлари Жиноят ишлари бўйича Ўзбекистон туман суди томонидан кўриб чиқилиб, ушбу фуқаро ҳуқуқбузарлик содир этган, деб топилган ва унга нисбатан 10 сутка маъмурий қамоқ жазоси тайинланган.
Шавкат Мирзиёев 5 февраль куни бўлиб ўтган йиғилишда 2023 йилда вояга етмаганлар 3,5 минг жиноят содир этганини айтганди. Шу муносабат билан мактаблардаги инспектор-психологлар штати Ички ишлар вазирлигидан Миллий гвардия тизимига ўтказилган.
Изоҳ (0)