Словакия полицияси мамлакат бош вазири Роберт Фицога суиқасд уюштирган 71 ёшли мухолифатдаги ёзувчи Юрай Синтулага нисбатан айблов эълон қилди. Бу ҳақда ТА3 телеканали хабар берди.
Маълум қилинишича, бош вазирга ўқ узган шахс 25 йилдан умрбодгача қамоқ жазосига ҳукм қилиниши мумкин. Юрай Синтула қасддан қасос олиш мақсадида қотилликка уринишда айбланмоқда. Ҳозирда у Миллий жиноий агентликнинг Нитра шаҳридаги полиция камерасида сақланмоқда.
Полиция 15 май куни тунда Юрай Синтула бош вазирга суиқасд уюштириш учун келган машинани тинтув қилган. Эркак яшаган турар жой биноси ёнида эса полиция навбатчилик қилган. TV Noviny телеканалининг эслатишича, апрель ойида Синтула Словакия ҳукумати йиғилишида митингга келган.
Эслатиб ўтамиз, 15 май куни Словакия бош вазири Роберт Фицога суиқасд қилинди. Ҳукумат раҳбарига 71 ёшли мухолифатдаги ёзувчи Юрай Синтула бир неча бор ўқ узган. Шундан сўнг Фицо кўкрак қафаси ва қорин бўшлиғидаги жароҳатлар билан шифохонага олиб кетилиб, операция қилинган.
Ҳозирда бош вазирнинг саломатлигига ҳеч қандай хавф йўқ. Юрай Синтула сиёсий сабабларга кўра суиқасд уюштирганини таъкидлаган. У Вазирлар Маҳкамасининг ОАВ эркинлигини чеклашга қаратилган ҳаракатларидан норозилик билдирган.
Изоҳ (0)