Slovakiya bosh vaziri Robert Fitsoga 15-may kuni sodir etilgan suiqasd siyosiy sabablarga ko‘ra amalga oshirilgan. Bu haqda siyosatchiga hujum qilgan muxolifatchi yozuvchi Yuray Sintula ma’lum qildi.
Erkakning bergan ko‘rsatmasiga ko‘ra, u hujumni bir oy oldin amalga oshirishni rejalashtirgan.
Hukumat siyosatiga qo‘shilmayman. OAV yo‘q qilindi, nega RTTVga hujum qilishadi? Nega Mazak o‘z lavozimidan chetlatilmoqda?, — deydi ko‘rsatma paytida Yuray Sintula.
Suiqasddan omon qolgan Robert Fitso kasalxonada og‘ir ahvolda qolmoqda.
Uning hayoti hanuz xavf ostida, operatsiya 3,5 soatdan ortiq davom etmoqda. U bu jarohatni yenga olishi uchun kuchli bo‘lishiga ishonamiz, — deydi Slovakiya mudofaa vaziri Robert Kalinak.
Slovakiyaning saylangan prezidenti Piter Pellegrini bosh vazirga suiqasd uyushtirilgani munosabati bilan xorijga safarini to‘xtatib, vataniga qaytgan. U 15-iyun kuni davlat rahbari lavozimiga kirishadi.
Slovakiya bosh vaziriga suiqasd
15-may kuni tushdan keyin Gandlova shahrida Slovakiya Vazirlar Mahkamasining majlisi bo‘lib o‘tdi. Tadbirdan so‘ng bosh vazir Robert Fitso yig‘ilish o‘tayotgan binodan chiqib, yaqin atrofda to‘plangan fuqarolarning oldiga bordi.
Shu payt olomon orasida turganlardan biri o‘qotar qurolni chiqarib, bosh vazirga o‘q uzishni boshlagan. Erkak siyosatchining ko‘krak qafasi va qorniga jarohat yetkazgan, shundan so‘ng u voqea joyida navbatchilik qilayotgan huquq-tartibot idoralari xodimlari tomonidan qo‘lga olingan. Xavfsizlik xodimlari, o‘z navbatida, Fitsoni mashinaga o‘tqazib, mahalliy shifoxonalardan biriga olib ketgan.
Keyinchalik Fitso jarrohlik amaliyotini o‘tashi uchun boshqa yuqori darajadagi shifoxonaga o‘tkazilgan. Bosh vazirning ahvoli og‘ir deb baholangan.
Ma’lum bo‘lishicha, suiqasd 71 yoshli yozuvchi tomonidan sodir etilgan. Sintula muxolifatdagi “Progressiv Slovakiya” partiyasi tarafdori va Fitsoni siyosati uchun bir necha bor tanqid qilgan. Rossiya Davlat dumasi Slovakiya hukumati rahbariga qilingan hujumni uning Ukraina bo‘yicha pozitsiyasi bilan bog‘lagandi.
Izoh (0)