Голливуд актрисаси Дрю Бэрриморнинг уйида олинган видео TikTok тармоғида тарқалиб, кўплаб муҳокамаларга сабаб бўлди. Фойдаланувчилар бойлиги 125 миллион долларга баҳоланган машҳур актрисанинг уйи жуда оддий ва камтарона кўринишидан ҳайратда эканини ёзишди.
Барчаси актриса ўзи бош ролни ижро этган “Тўйдаги хонанда” номли фильмни томоша қилган видеосини интернетга жойлаганидан сўнг бошланди. Дрю мазкур фильм эфирга узатилаётганини кўриб қолгани учун ёга машғулотини кейинга қолдиргани ҳақида оддий хабар қолдирган.
Бироқ фойдаланувчиларни бошқа жиҳат ўзига жалб этди: видеода улар тахминан 11 дюймли кичик телевизор ва оддий хонадонга эътибор қаратди. Бадавлат актрисанинг бундай уйда яшаши мухлисларни ҳайрон қолдирди.
Видеога қолдирилган изоҳларда мухлислар юлдуз яшайдиган хонадон улар кутганидан бутунлай бошқача кўринишга эга эканини қайд этди. TikTok фойдаланувчиларидан бири:
Миллионлаб доллар маблағга эга актрисанинг меҳмонхонасида 11 дюймли телевизор борлиги мени ҳайратга солди, — деб ёзди.
Бэрриморга мухлисларнинг бундай муносабати жуда ёқди ва уларга квартиранинг бошқа хоналарини кўрсатишга қарор қилди. Видеолардан бирида оддий футболка ва шим кийган Дрю ошхонада кичик газ плитасида тухум қовурарди. Видеода актриса шу уйда қолишни яхши кўришини ва кўчага камдан кам ҳолларда чиқишини айтиб ўтди.
Фойдаланувчилар Дрюнинг кундалик кийимда ва ҳеч қандай пардозсиз видеога тушишини ҳам қайд этди:
Актриса жуда камтар ва ёқимли инсон! Менимча, у ҳаётда оддий нарсаларни яхши кўради ва кибрга берилмаган юлдузлардан ҳисобланади, — дея изоҳ қолдирган TikTok фойдаланувчиларидан бири.
Изоҳ (0)