Ўзбекистон маҳаллалари уюшмаси “Фуқаролар йиғини раиси сайлови тўғрисида”ги қонун лойиҳасини муҳокамага қўйди.
Янги таҳрирдаги қонун лойиҳаси 6 та боб ва 35 та моддадан иборат бўлиб, шаҳарча, қишлоқ, овуллардаги маҳалла фуқаролар йиғини раиси сайловини ташкил этиш ва ўтказиш соҳасидаги муносабатларни тартибга солишдан иборат.
Қонун билан фуқаролар йиғини раиси сайловини умумий, тенг, тўғридан тўғри сайлов ҳуқуқи асосида яширин овоз бериш орқали ўтказиш белгиланмоқда.
Шунингдек:
- сайловга тайёргарлик кўриш ҳамда уни ўтказишга доир барча тадбирларда, сайлов куни овоз бериш хоналарида ва овозларни санаб чиқишда иштирок этувчи кузатувчиларнинг таркиби, ҳуқуқ ва мажбуриятлари белгиланмоқда;
- фуқаролар йиғини раиси лавозимига номзод тегишли ҳудуддаги кўчалар, кўп квартирали уйлардан доимий ёки вақтинча истиқомат қилаётган сайлаш ҳуқуқига эга бўлган фуқаролар умумий сонининг камида ўн фоизи киритган таклиф асосида кўрсатилиши назарда тутилмоқда;
- фуқаролар йиғини раиси сайловини ташкил этиш ва ўтказиш бўйича ишчи гуруҳнинг миқдор таркиби ҳамда ваколатлари аниқлаштирилмоқда, хусусан, овоз бериш биноларини жиҳозлаш ва уларда зарур тартибни сақлаб туриш масъулияти ишчи гуруҳ зиммасига юклатилмоқда;
- фуқаролар йиғини раиси лавозимига номзоднинг сайловолди ташвиқоти олиб бориш учун ишончли вакилга эга бўлиш тартиби белгиланмоқда.
Бундан ташқари, Ўзбекистон маҳаллалари уюшмаси ва унинг ҳудудий бўлинмаларининг сайловдаги ўрни ҳамда такрорий овоз беришни ўтказиш ва бўшаб қолган ўринларга фуқаролар йиғини раиси сайлови ўтказишнинг аниқ тартиби ва муддатлари белгиланмоқда.
Эслатиб ўтамиз, 2020 йилда президент Шавкат Мирзиёев ҳокимларни халқ сайлаши кераклигини таъкидлаб ўтган эди. Кейинроқ Олий Мажлис Сенат раиси Танзила Норбоева ҳокимлар, албатта, сайланиши кераклиги, бироқ бу жараён босқичма-босқич бир неча йил давомида амалга оширилишини айтганди. 2021 йил мартда ҳам давлат раҳбари ҳокимларни сайлаш жараёни ҳақидаги гап-сўзларга муносабат билдирган эди.
Изоҳ (0)