Фарғона вилояти ҳокими Хайрулло Бозоров Қозоғистоннинг Ўзбекистондаги фавқулодда ва мухтор элчиси Бейбут Атамкуловни қабул қилди, деб хабар бермоқда вилоят ҳокимлиги матбуот хизмати.
Учрашувда Фарғона вилояти ва Қозоғистон ўртасида ҳудудлараро инвестициявий, савдо-иқтисодий, ижтимоий соҳалардаги ҳамкорлик алоқаларини бугунги ҳолати таҳлил қилинди, ривожлантириш истиқболлари муҳокама қилинган. Вилоят раҳбари текстиль-трикотаж, кимё саноати, мева-сабзавот етиштириш ва қайта ишлаш, чарм-пойабзал саноати каби соҳаларнинг вилоятимиз иқтисодиётида катта ўрин тутишини айтиб, бу соҳаларда ўзаро манфаатли алоқаларни йўлга қўйиш масаласини ўртага ташлаган.
Бейбут Атамкулов Фарғонага ташрифдан кўзланган асосий мақсад Қозоғистоннинг ривожланган вилоятлари билан Фарғона ўртасида тўғридан тўғри ҳудудлараро ҳамкорликни йўлга қўйишга кўмаклашиш эканини маълум қилган. Инновацион технология ва ишланмаларни татбиқ этиб, минглаб янги иш ўринларини яратаётган, мамлакатдаги етакчи тўқимачилик компанияларидан бири бўлган Фарғонадаги Global Textile МЧЖ томонидан Қозоғистоннинг Туркистон вилоятида Глобал Textile Тurkestan пахта-тўқимачилик кластери лойиҳаси муваффақиятли давом эттирилаётгани қайд этилди.
Ҳозирги кунда Фарғона вилоятида Қозоғистон капитали иштирокида 19 та корхона фаолият олиб бораётгани, Фарғона вилоятининг Қозоғистон билан ташқи савдо айланмаси ўтган йилда 245 млн долларга тенг бўлгани қайд этилиб, бу кўрсаткичларни сезиларли даражада ошириш учун барча зарур шарт-шароитлар ва салоҳият мавжудлиги таъкидланди.
Учрашув давомида шунингдек, олий таълим соҳасида ҳамкорликни йўлга қўйиш, вилоятимизда Қозоғистоннинг дунёнинг топ ОТМлари рейтинги илк 1000 таликка кирган университетларидан бирининг филиалини очиш, фарғоналик ёшларни грант асосида Қозоғистон университетларида таълим олишларини ташкил этиш масаласи ҳам муҳокама қилинди.
Туризм соҳасида ҳамкорликни ривожлантириш, Фарғона шаҳрида Олмаотага тўғридан тўғри авиақатновларни йўлга қўйиш масалалари ҳам учрашув кун тартибидан ўрин олди. Фарғона вилоятлари расмийлари ва тадбиркорларидан иборат делегациянинг яқин ойларда Қозоғистоннинг қатор йирик вилоятларига ташрифини ташкил этишга келишиб олинди.
Изоҳ (0)